Хотун Бүлүү-2016 ааты Үөдүгэйтэн биэс оҕолоох Анастасия Данилова ылла

205

Ийэ декадатын чэрчитинэн улууспутугар «Хотун Бүлүү-2016» диэн орто саастаах кэрэ аҥаардарга, күн-күбэй ийэлэргэ аналлаах сонун тэрээһини Норуот айымньытын уонна П.Н.Тобуруокап аатынан сынньалаҥ киинин көҕүлээһинэринэн ыытылынна.


Бу бырайыагы норуот айымньытын киинин специалиһа Алена Аркадьевна Ким иилээн, бэйэтин ураты буочарынан сүрүннээн, түһүмэхтэрэ арыый атыннык, ураты сэргэхтик тэриллибиттэрэ көрөөччүлэри сэргэхситтэ. Уопсайа сэттэ күн-күбэй ийэ алта түһүмэҕинэн күөн көрүстүлэр, биэс киһиттэн састааптаах анал дьүүллүүр сүбэ сыаналаата. Күрэххэ кыттыбыт хас биирдии кэрэ аҥар уйулҕаларын таба тайанан, Алена Ким сөрү-сөпкө макияжтарын, прическаларын оҥорбута харахха быраҕылынна. Бары даҕаны бииртэн-биир кэрэлэрин, ийэлэрбит барахсаттар. Улууспутугар биллэр урбаанньыт «Модная точка» бутик маҕаһыын хаһаайката Эльвира Афанасьевна Федорова күһүҥҥү уонна кыһыҥҥы табаардарын рекламалаан, көрдөрүүлэрэ күрэх тыҥааһыннаах кэтэһиитин биллэ тупсарда.

Ураты куонкурус түмүгүнэн анал номинациялар олохтоннулар. Ол курдук, «Кэрэчээнэ Куо» — Сардаана Спиридонова (Балаҕаннаах нэһилиэгэ), «Чөмчүүк Хотун» — Любовь Ферапонтова (Үөһээ Бүлүү сэлиэнньэтэ), «Арылы Хотун» — Зинаида Егорова (Үөдүгэй нэһилиэгэ), «Сандаарыйа Хотун» — Ньургустана Бугулова (Үөһээ Бүлүү сэл.), «Талбаана Хотун» — Сардана Васильева (Ороһу нэһ.). Онтон «Кыталыына Хотун» номинацияны уонна «Көрөөччүлэр биһирэбиллэрэ» үрдүк ааты Евдокия Байанаева ылыан ылла. Улууска аан маҥнай ыытыллыбыт куонкурус үрдүкү — «Ийэ Хотун-Хотун Бүлүү» үрдүк ааты Үөдүгэй нэһилиэгин олохтооҕо, биэс оҕо иһирэх ийэтэ Анастасия Данилова буолла.

Маны таһынан Үөһээ Бүлүүтээҕи дьахталлар Сэбиэттэрин анал бирииһин Сардана Васильеваҕа бэрэссэдээтэл Пелагея Дмитриевна Иванова туттарда. «Аллараа Бэстээх» тыа хаһаайыстыбатын техникаларын саппаас чаастарын атыылыыр маҕаһыын анал бирииһин Зинаида Егороваҕа анаатылар.

Күрэх сыанатын көстүүтүн илиитигэр талааннаах Евдокия Михайлова дизайннаабыта, күрэҕи ордук арылхайдык арыйда. Улууспутугар саҥа сүүрээннээх сонун тэрээһин үрдүк таһымҥа ыытыллыбыта олохтоохтор, көрөөччүлэр дуоһуйа астыммыттара, сүргэлэрин көтөхпүтэ – тэрийээччилэри, культура үлэһиттэрин үрдүккэ кынаттаата.