Мэҥэ Хаҥалас улууһун II-с Наахара нэһилиэгэр өр сылга кэтэспит кулууптара тутулла турар. Саҥа кулууп киэҥ хайысхалаах култуура комплекса диэн ааттаныаҕа.
Саҥа тутууну Майаттан тахсан Руслан Трофимов салайааччылаах 4 киһилээх биригээдэ тутар. Тутааччылар ортолоругар Наахараттан төрүттээх, эргэ кулууп дьиэтигэр элбэхтик ыллаабыт, самодеятельность көхтөөх кыттааччыта Виталий Харитонов баар.
Нэһилиэк олохтоохторо бу куполлыы быһыылаах сэндвич-панель дьиэ тутуутугар күүстэрэ кыайарынан көмөлөстүлэр. Ол курдук Николай Попов, Григорий Прокопьев, Иннокентий Тимофеев курдук уопуттаах механизатордар тракторынан буор куттардылар. Афанасий Исаков, Николай Данилов тыраахтардарын уларыстылар. Эдэр ыччат, оскуола эр дьоно эмиэ күүс-көмө буоллулар. «Быйыл култуура комплексын көҥдөйө бүтүөхтээх. Эһиил үлэҕэ киириэ диэн эрэнэбит. Саҥа комплекска кулууп, мусуой, библиотека, хонтуора баар буолуохтара. Үлэҕэ киирдэҕинэ, айар талааннаах, ырыаһыт-тойуксут нэһилиэк өссө сайдыаҕа», — диир дириэктэр Н.И.Слепцова.