Муома оройуонугар чөл олох чэрчитинэн спорт сайдыытыгар улахан болҕомто ууруллар. Оройуон баһылыга Петр Черемкин, нэһилиэк баһылыга Александр Андреев спортсменнары, күрэхтэһиилэри куруук өйүүллэр.
«Муома национальнай нэһилиэгэ» МТ көҕүлээһининэн хомуур хапсаҕай күрэхтэһиитэ ураты сэргэхтик ыытылынна. Күөн көрсүһүүгэ «Арктика суоллара» казеннай тэрилтэ (салайааччы Константин Терешкин), баһаары утары сулууспа этэрээтин (начаалынньык Серафим Мараказов) уонна Муома орто оскуолатын (дириэктэр Сергей Мартынов) бөҕөстөрө кытыннылар.
Тыҥааһыннаах киирсиигэ баһаарынньыктар спортсменнара инники күөҥҥэ түһэн бастаатылар. Муома орто оскуолатын хамаандата – иккис, «Арктика суолларын» хапсаҕайдьыттара үһүс бириистээх миэстэлэри ыллылар.
Биирдиилээн күөн көрсүһүүгэ Албан Старков муҥутуур кыайыылааҕынан тахсан, үөрүү өрөгөйө буолла. Кыайыылаахтар дохсун ытыс тыаһыгар доҕуһуоллатан грамоталары, харчынан бириэмийэлэри туттулар.
Күүрээннээх күрэхтэһии кылаабынай судьуйатынан Сэбиэскэй Сойуус спорка маастара, көҥүл тустууга Аан дойду икки төгүллээх чөмпүйүөнэ Семен Соркомов үлэлээтэ.