Ыам ыйын 16 күнүгэр «И.К.Спиридонов аатынан МУП» таба иитэр ыстаадаларын бостууктарыгар, сиэдэрэй оҥоһуулаах саҥа болохтору (балок) туттарыы тэрээһинэ нэһилиэккэ сынньалаҥ пааркатыгар буолан ааста.
Бу болохтор аныгы үйэ ирдэбилигэр толору эппиэттиир матырыйааллартан оҥоһуллубуттар, тупсаҕайдар. Балары туттарыы үөрүүлээх тэрээһинин сиэрин-туомун ситэрэн В.А.Туприн алҕаата.
МУП дириэктэрэ Соловьев М.Е. аалай кыһыл лиэнтэни быста, үөрүүлээх быһыыга-майгыга болох ордердарын туттарда. Улуус дьаһалтатын аатыттан улуустааҕы тыа хаһаайыстыбатын управлениетын салайааччыта А.В.Неустроев саҥа болохторго тиксибит табаһыттары эҕэрдэлээтэ. Сааскы төрүөх хампаанньатын этэҥҥэ ыыталларыгар, сыралара үчүгэй түмүктээх, ситиһиилээх буоларыгар, үрдүк таһаарыылаах үлэни баҕарда. Маннык хабааннаах тэрээһин, үлэ МУП таба иитиитинэн дьарыктанар ыстаадаларга инникитин да ыытыллыаҕын эттэ. Тэрээһиҥҥэ мустубут ыалдьыттары саҥа болохтор хаһаайыттара итии чэйинэн, сыалаах этинэн күндүлээтилэр.
Эдэр табаһыттар «И.К.Спиридонов аатынан МУП» таба иитиитигэр былааннаах үлэтин сиһилии билэн-көрөн, эбиитин саҥа тупсаҕай оҥоһуулаах болохторго тиксэн итэҕэйдилэр уонна тэрилтэ салалтатыгар махтаннылар. Онон нэһилиэккэ таба иитиитин инники сайдыытыгар эрэлбит улаатта уонна бөҕөргөөтө. Табаһыттарга барыларыгар сыралаах үлэлэригэр үрдүк ситиһиилэри, кытаанах доруобуйаны баҕарабыт. Таба иитиитэ сайдарыгар эрэнэрбитин биллэрэбит.