Ахсынньыга оскуола 85 сааһын бэлиэтиир өрөгөйдөөх кэммит. Ыалдьыттары оскуола олбуоругар хаар уонна муус остуоруйа дьоруойдара, саҥа дьыллааҕы Харыйа үөрэ-күлүмнүү көрсөллөр.
Ыалдьыттар саҥа оҥоһуллубут стендэлэргэ бэйэлэрин кылаастарын оҕолорун кытта түспүт хаартыскаларын көрөн, оҕо эрдэҕинээҕи саастарын санаатылар. Салгыы музейга аастылар. Онно эмиэ экспонаттары кытта билистилэр, ол кэмнээҕи үлэни-хамнаһы иһиттилэр. Ордук 1931-1979 с. диэри бу оскуолаҕа үлэлээбит учууталлар хаартыскаларын стендэтэ, учууталларга уонна үлэһиттэргэ анаан оҕолор оҥорбут альбомнара дьон болҕомтотун тартылар.
Кылаас чаастарыгар урут үөрэммит оҕолор көрсүһүүлэрэ ыытылынна, выпускниктар үөрэммит сылларын туһунан кэпсээн, ахтан-санаан аастылар.
Өссө биир сонун түгэнинэн “Индигиртэн иэйиилэнэн, Абыйтан алгыстанан” диэн учуутал, поэт Григорий Дохунаевка анаммыт кинигэ биһирэмэ буолла. Кини хоһоонноро ааҕылыннылар, ырыалара ылланнылар.
Эбиэт кэнниттэн үбүлүөйбүт үөрүүлээх чааһа кулууп дьиэҕэ салҕанна.
Манна үлэ дьоно чиэстэннилэр. Ол курдук, СР үөрэҕириитин бочуоттаах бэтэрээнэ бэлиэни соцпедагог Севостьянова З. Н., РФ наукаҕа уонна үөрэҕириигэ министерствотын грамотатын математика учуутала Дохунаева М. А., СР үөрэҕириитин туйгуна бэлиэни үөрэх чааһыгар дириэктэри солбуйааччы Кычкина А. А., алын сүһүөх кылаас учуутала Павлова А. Ф., СР үөрэҕириитин министерствотыттан Бочуотунай грамотаны саха тылын уонна төрүт культура учуутала Слепцова С. Г., педагог-тэрийээччи Сорокоумова А. Г., СР үөрэҕириитин министерствотыттан махтал суругу техүлэһиттэр Томскай В. И., Слепцова А. И. туттулар. Улуус баһылыгын Бочуотунай грамотатын уонна илии чаһытын алын сүһүөх кылаас салайааччыта Реброва М.В., педагогическай үлэ бэтэрээнэ Старостин К.И. ыллылар. Олохтоох дьаһалта уонна оскуола ааттарыттан бары үлэһиттэр бэлиэтэннилэр.
Үөрэнээччилэр эҕэрдэ нүөмэрдэринэн быысаһа оскуола историята хоһоонунан ааҕыллан, хаартысканан кэпсэнэн арыллан истэ. Араас сиртэн видеоэҕэрдэлэр киэһэни киэргэттилэр, ол курдук биһиги оскуолабыт аатын сүгэр В.Н.Дохунаев кэргэнэ Дария Николаевна, саха тылын, литературатын, музыка учууталынан, директорынан үлэлээбит Бысыин А.Д., оскуола кырдьаҕас выпускниктара Т.И., В.И.Сорокоумовтар, Н.Н.Черемкин, 1979 сыллартан Виктория Слепцова, халыҥ аймах Дохунаевтар сиэн балыстара-бырааттара, уо. д. а. эҕэрдэлэрин дьон астына көрдө-иһиттэ.
Мустубут дьону нэһилиэк ытык кырдьаҕаһа, оскуола выпускнига Стручков Н. Г. эҕэрдэлээтэ, бэлэх тутта.
Араас сылларга оскуоланы бүтэрбит выпускниктар сыанаҕа тахсан үөрэммит оскуолаларын эҕэрдэлээн, махтанан тыл эттилэр, бэлэх туттардылар. Оскуола 1983 с. выпускнига, меценат Ребров Григорий Васильевич 100 000 солк оскуолатыгар бэлэх уунарын туһунан эҕэрдэни мустубут дьон дохсун ытыс тыаһынан дуоһуйа, астына, үөрэ-көтө сэргээн бэлиэтээтилэр.
Тэрилтэ салайааччыларыгар оҕолор балык уҥуоҕунан уруһуйдаабыт хартыыналарынан оҥоһуллубут 2017 сыл календарын оскуола директора Мария Михайловна туттарда. Оттон үөрэнээччилэр бэйэлэрэ оскуола туһунан суруйбут хоһооннорунан таҥыллан тахсыбыт хомуурунньуктарын уһун сылларга үлэлээбит бэтэрээн учууталларга бэлэх ууннулар.
Оскуола үүнэригэр-сайдарыгар олук уурар, көмөлөһөр дьон баара сылтан сыл элбии турарыттан үөрэбит. Кинилэргэ, төрөппүттэргэ махтал тыл бастыҥа этилиннэ. Бэтэрээннэрбит да туора туран хаалбакка бу киэһэ илии тутуурдаах төнүннүлэр. Буолбут тэрээһиннэргэ сылдьыбыт дьон оскуола эмблемата ойуулаах значок, магнитка, бу күн түспүт хаартыскаларын бэлэх быһыытынан тутан үөрэн тарҕастылар.
Сарсыҥҥы күнүгэр төрөппүттэр оҕолорго анаан толору баай-талым астаах остуолу, оонньууну-көрү бэлэмнээн үөртүлэр. Оскуола үбүлүөйүгэр ананан ыытыллыбыт күрэхтэр түмүктэрэ тахсан хоһоон суруйуутугар, ааҕыытыгар, уруһуй күрэҕэр бастаабыт оҕолор грамота туттулар. Хас биирдии оҕоҕо бырааһынньыктааҕы лотерея, фейерверк умнуллубат үөрүүнү бэлэхтээтэ.
Бырааһынньыкпыт биир тыынынан олус сэргэхтик, тэрээһиннээхтик ааста. Үбүлүөй диэн ырыа-тойук, үҥкүү-битии эрэ буолбатах. Бу кэрдиис кэм историятын үөрэтии, ону дьоҥҥо-сэргэҕэ таһаарыы, түмсүүлээх буоларга угуйуу, суох буолбуттары кэриэстээһин, үлэ дьонун чиэстээһин буоларын өйдөөн кэлэктиип, үөрэнээччилэр, төрөппүттэр биир киһи курдук сомоҕолоһон, үлэ-хамнас эрдэттэн ыытыллыбыта оруннаах.
Суол суоҕуттан ыраах сирдэртэн дьон-сэргэ кэлбэтэҕэ хомолтолоох. Ол да буоллар ыҥырыылаах ыалдьыттарбыт аныгы үйэ ситиминэн интернет нөҥүө билсэн, санаабытын көтөҕө, эҕэрдэлэрин ыыта, үөрүүбүтүн үллэстэ олорбуттарыттан астынабыт, махтанабыт.