Саха Республикатын Гражданскай уопсастыба институттарын сайыннарыы министерствотын көҕүлээһининэн тэриллибит государство бюджетыттан субсидия ылалларыгар туһуламмыт куонкуруска Үөһээ Бүлүүтээҕи Кииннэммит библиотека ситимэ уонна улуустааҕы инбэлииттэр уопсастыбалара кыайыылаах аатын ыллылар.
90-тан тахса коммерческайа суох тэрилтэлэр кыттыылаах куонкуруска уопсайа 25 Грант туттарылынна. Маныаха тулалыыр эйгэни харыстааһыҥҥа, тупсарыыга, кыылы-сүөлү көмүскээһиҥҥэ, социальнай араҥаҕа киирэр нэһилиэнньэҕэ көмө, өҥө, өйөбүл оҥорорго туһуламмыт сүрүн сыаллаах бырайыактары көмүскээһиҥҥэ юридическай сирэй быһыытынан регистрациялаах общественнай тэрээһиннэр, государственнай муниципальнай, коммерческай уонна коммерческайа суох тэрилтэлэр, ону тэҥэ биирдиилээн дьон кыттыыны ыллылар.
Кииннэммит библиотека ситимэ «Суруйааччылар ыллыктара» бырайыактарын көмүскээн 1 мөлүйүөн суумалаах субсидияны ылан үөрэн-көтөн олороллор. Бу туһунан библиотека директорын солбуйааччы Сардана Прокопьева кэпсиир: «Суруйааччылар ыллыктара» диэн бырайыакпыт 4 народнай, 21 улууспут киэн туттар суруйааччыларыгар аналлаах литературнай сквер оҥоруута буолар. Манна беседка, суруйааччыларбыт портреттара, кинилэр тустарынан кэпсиир стендэлээх буолар. Плитканан ууруллубут тротуар, дьон сынньалаҥар аналлаах ыскаамыйалар, сибэкки, от-мас арааһын олордон дендрарий баар буолуоҕа. Бу беседкаҕа саас, сайын, күһүн араас тэрээһиннэри ыытардыы былаанныыбыт: биллэр дьону, суруйааччылары кытта көрсүһүүлэр, литератрунай биэчэрдэр, улахан кылаас оҕолоругар, эдэр ыччакка аналлаах тэрээһиннэр. Билигин беседка уонна тимир күрүө оҥоһуллан турар. Күһүн 35 хатыҥы олордубуппут, саас салгыы атын мастары олордуохпут. Кэлэр сылга халлаан сылыйда да бетоннааһын, тротуар оҥоруута ыытыллыаҕа. Оттон бу 1 мөлүйүөн суумалаах Грант харчытыгар суруйааччыларбыт портреттарын аныгылыы көстүүлээх гына саҥа технологиянан толкуйдаан оҥотторор былааннаахпыт. Түөрт народнай суруйааччы мөссүөннэрин ураты дизайннаан оҥотторуохпут.»
999 100 тыһ.солк. суумалаах Граны ылары ситиспит инбэлииттэр уопсастыбаларын бэрэссэдээтэлэ Зоя Петрова иһитиннэрдэ: «Бу ылбыт Граммытын спортивнай инвентарь ыларбытыгар туһаныахпыт. Бүгүҥҥү күҥҥэ улууспут үс нэһилиэгэ дуогабар түһэрсэн олорор, маныаха бу үбүнэн инвентарь ыллахпытына нэһилиэктэринэн спордунан дьарыктанар доруобуйаларынан хааччахтаах дьон эрчиллиэхтэрэ.»