Уопсастыбаннай үлэлээх киһи олохтон хаалбат диэн санаалаахтар Эдьигээн көхтөөх дьоно

163

Кыстатыам эбэҥки нэһилиэгин олохтооҕо, педагогическай үлэ ветерана Татьяна Николаевна Бурцева соторутааҕыта Софья Сидорова аатынан бириэмийэни туппута.


— Уопсастыбаннай үлэнэн дьарыктаныым оскуола саҕаттан саҕаламмыта. Биһиги Эдьигээҥҥэ сэттис кылааһы бүтэрэрбитигэр, Кыстатыам оскуолата аҕыс кылаастаах буолбута. Онон төрөөбүт дойдубутугар үөрэ-көтө төннүбүппүт. Бастакы мунньахха миигин оскуола комсомольскай тэрилтэтин секретарынан талан кэбистилэр. Дьэ ол кэмтэн общественнай улэттэн туора тура иликпин. Ол саҕана оскуола учууталлара уопсастыбаннай олох инники күөнүгэр сылдьар дьон этэ. Онон үрдүкү кылаас оҕолоро эмиэ учууталларбытын кытта концертарга кыттан, араас мунньахтары ыытан, субуотунньуктары тэрийэн тэбис-тэҥҥэ сүүрэрбит-көтөрбүт.

Саамай уһуннук дьахтар сэбиэтигэр үлэлээтим. 90-с сылларга элбэх оҕолоох ийэ быһыытынан, дьахтар сэбиэтин председателинэн талбыттара. Бу сыллар устата олохпут укулаата төрдүттэн уларыйда, дьахтар комитета сүрүн болҕомтотун дьиэ кэргэн олоҕор-дьаһаҕар ,оҕолору иитиигэ, эдэр, элбэх оҕолоох ийэлэри өйөөһүҥҥэ, кырдьаҕас ийэлэргэ, тулаайах оҕолорго, соҕотох ийэлэр кыһалҕаларыгар, бөһүөлэк санитарнай туругар туһаайан кэллибит.

Ити үлэм сыаналанан, аан дойду дьахталларын күнүнэн сибээстээн, Софья Сидорова аатынан республикаҕа общественник-дьахталларга аналлаах бириэмийэни Ил Дархан илиититтэн туттум. Общественнай үлэҕэ эриллэн улааппытым, тус бэйэм инники олохпун салайынарбар, сөптөөх быһаарыныылары ылынарбар олус туһалаах буолбута. Олоххо көхтөөх киһи олорор сирин, биир дойдулаахтарын иннигэр эппиэтинэһи сүгэн, туох эрэ үчүгэйи, сонуну оҥордоҕуна бэйэтин олоҕун укулаатын тупсарынар, санаатын бөҕөргөтүнэр, инники олоҕор сыал-сорук туруорунар диэн санаалаахпын. Мин саастаах киһибин, ол гынан баран билигин да общественнай үлэттэн туора турар санаам суох, — диэн Татьяна Бурцева санаатын эттэ.