Уус Алдан улууһугар СӨ правительствотын отчуота салҕанан барар. Бүгүн правительство бэрэссэдээтэлин солбуйааччы А. П. Дьячковскай салайар бөлөҕө үлэтин Арыылаах коррекционнай оскуолатын, ФАП, дьыссаат туруктарын көрүүттэн саҕалаата. Салгыы Бэйдиҥэҕэ балыыһаны, котельнаҋы, оҕо саадын көрдүлэр.
Ыччат дьон санааларын этэр, ыйыталаһар буолбуттарын бу отчуоттарга бэлиэтиир тоҕоостоох. Холобур, Бэйдиҥэ бөһүөлэгиттэн Г.Салышев, И.Артамонов, М.Сивцев гаас оттукка көһүү, нефть сыанатыгар, олохтоох баһаарынай чаас иһинэн өйдөтөр-сэрэтэр үлэни ыытыыга харчы көрүллүүтүн тула ыйыттылар.
Өнөргө олохтоохтор сыллата туруорсар боппуруостарынан Россия геройа М.Стрекаловскай аатынан саҥа оскуола тутуута буолар. Бу да сырыыга ону умнубатылар. А.С Черноградскай автоматизация диэн тыл тыа сиригэр охсуулаах буоларын, инвестпрограмманан тутуулар Өнөр нэһилиэгэр ыытыллыбаттарын ыйда. А.А.Ушницкай саҥа котельнай үлэҕэ киирбитин, ыаллары киин ититии ситимигэр холбооһуҥҥа дьон бэйэтэ эмиэ сөптөөх дьайыыны оҥоруохтааҕын ыҋда. Н.Н.Литвинцев бэйэтин санааларын эттэ. П.Н.Атласов үүт харчыта тыа хаһаайыстыбатын управлениетын нөҥүө кэмигэр кэлэн түҥэтиллэрин, соҕотуопкалааччыттан ылар ыарахан буолара буолуо диэн эттэ. «Сүөһү төбөтүгэр субсидия көрүллэрэ наадалаах этэ. Биһиэхэ түөрт эдэр ыччат граҥҥа хапсан сүөһү, сылгы иитиитинэн дьарыктанан эрэллэрин, правительство өттүттэн үлэ бары хайысханан сөптөөхтүк ыытылларын бэлиэтиибин. Маннык программалар салгыы үлэлээн, үбэ өссө элбээн иһэригэр баҕарабын«, — диэтэ кини.
Бу курдук нэһилиэк олохтоохторо отчуот бөлөҕүн кытары санаа атастаһан, үлэни сөптөөҕүнэн сыаналаан тарҕастылар.
Салгыы А.П.Дьячковскай салайар бөлөҕө Тулунаҕа отчуоту туруорда. Тулуналар олох балысханнык сайдарын, дэриэбинэ улахан аҥара бастакынан ититии ситимигэр холбонон олорорун эттилэр, салгыы саҥа кыамталаах котельнай үлэҕэ киирэрэ уолдьаспытын бэлиэтээтилэр. М.И.Дегтярева, А.И.Бурнашев, Ф.Д.Бысыин, М.Е.Васильева ыйытыыга, кэпсэтиигэ көхтөөхтүк кытыннылар, правительство ыытар үлэтин үчүгэҋинэн сыаналаатылар. Санааларын этэн, сөптөөх хоруйу ылан тарҕастылар.
Отчуокка кыттыыны ыллылар доруобуйа харыстабылын министирин солбуйааччы А.Н.Григорьева, промышленность уонна геология министирин солбуйааччы В.В.Калашников, үөрэх уонна наука министерствотын кадры аттарыыга уонна орто үөрэхтээһинин экономическай туругун былааннааһын салайааччыта О.С. Громова, «Саханефтегаз» аһаҕас общество маркетинг отделын салайааччыта В.В.Цыганов, үп министерствотын отделын начальнига С.А.Семенов, Тыа хаһаайыстыбатын министиэристибэтин специалиһа В.Д.Сыроватскай уонна улуус дьаһалтатын управленияларын начальниктара.