«Кыһын Саха сириттэн саҕаланар» тэрээһин Амма нэһилиэгин оҕо аймаҕар умнуллубаттык, уоттаахтык-күөстээхтик ааста.
Ф. Потапов аатынан культура киинин үлэһиттэрэ «Маша уонна эһэ» мульткиинэҕэ олоҕуран оонньуу туруордулар. 300 миэстэлээх саалаҕа лыык курдук киһи муһунна. Киһи сүргэтин көтөҕөр Машенька Тымныы королева саарыстыбатыгар мүччүргэннээх сырыыларын көрө олорор дьон ытыстарын тыаһын харыстаабатылар. Бүппүтүн кэннэ дьон өссө биирдэ бу айымньыны көрүөхтэрин баҕаралларын этиммиттэригэр, кулууп үлэһиттэрэ хатылыах буолан эрэннэрдилэр.
Маны сэргэ «Чудо валенка», «Новогодний серпантин» харыйа оонньуурдарын күрэҕэ ыытыллан, кыайыылаахтар грамоталары, оонньуурдары бэлэх туттулар.
Бу кэнниттэн бука бары Кыайыы болуоссатыгар күргүөмүнэн тахсан Тымныы оҕонньордуун Сана дьыллааҕы Харыйа уотун фейерверк анныгар уматан саамай алыптаах, күүтүүлээх бырааһынньык ааммытын тоҥсуйара чугаһаабытын итэҕэйдибит.