Амма киинигэр арыгы атыыланара тохтуо

174

Амма нэһилиэгин депутаттара уочараттаах сессияларыгар арыгыны атыылааһын Балаһыанньатыгар уларытыыны киллэрии туһунан дьүүллэстилэр.


Сессияны бэрэссэдээтэл Д.И. Неустроев салайан ыытта. Кыттыыны нэһилиэк баһылыгын э.т. С.А. Соломонов, Амма нэһилиэгин общественнай Сэбиэтин бэрэссэдээтэлэ С.М. Трофимов, „Амма“ ПО бэрэссэдээтэлэ А.М. Носов ыллылар.

Бэбиэскэҕэ биир боппуруос турда. Ол курдук, общественность туруорсуутунан эрдэ ылыллыбыт арыгы атыытыгар киллэриллибит Балаһыанньаҕа уларытыыны киллэрии туһунан буолла. Бэлиэтээн эттэххэ, „Муона“ кыбаарталын олохтоохторун суруктара, туруорсуулара бу боппуруоска олук буолла.

Баһылык э.т. С.А. Соломонов депутаттарга кылгастык туохтан сибээстээн уларыйыы киирэр боппуруоһа турбутун, СӨ арыгы бородууксуйатын бытархай атыыга лицензияны биэрэр уонна хонтуруоллуур управлениетынан ыытыллыбыт социологическай ыйытык түмүктэрин туһунан кэпсээтэ. Хаһыаппытыгар бу ыйытык түмүктэрин таһаарыахпыт. Арай бу ыйытык биир боппуруоһун билиһиннэрдэххэ, ыйытыллыбыт дьонтон Амма нэһилиэгэр арыгыны атыылааһыны нэһилиэк территориятыттан таһаарыыга диэҥҥэ 46, онтон букатын боборго 40 бырыһыана эппит. Депутаттар иннилэригэр общественнай Сэбиэт бэрэссэдээтэлэ С.М. Трофимов общественность аатыттан арыгы атыытын үөрэх, култуура, оҕо уонна спорт тэрилтэлэриттэн 300 миэтэрэ диэни 1200 миэтэрэҕэ диэри улаатыннарарга этэр. Оччотугар улууспут киинигэр арыгы атыылааһына суох буолан, итирик дьон туора-маары хаамыылара, ааһан иһэр дьонтон харчы көрдөөн сордууллара аччыа, арыгыны дэбигис атыылаһыы тохтуо этэ диэн этэр. Манна кини Чурапчы улууһун киинигэр арыгынан эргинэр маҕаһыыннар нэһилиэк тас өртүгэр тахсаннар хартыына лаппа тупсубутун бэлиэтээтэ. Онон депутаттар общественность санаатын өйүүллэригэр баҕарда. „Амма“ ПО бэрэссэдээтэлэ А.М. Носов хааччахтааһын киирэрэ наадатын этэн туран, итинник дьаһаныы хартыынаны улаханнык уларыппатын, ол оннугар сокуоннайа суох эргинээччилэр элбиэхтэрэ, баар „туочукалары“ кыайбакка сылдьабыт диэн санааны үллэһиннэ. Депутаттар эмиэ санааларын хото эттилэр. И.А. Артемьев килэмиэтири улаатыннаран дьыала быһаарыллыбатын, инникитэ суоҕун, ол оннугар уоран атыылааччылар элбиэхтэрэ, кыра ыстарааптары төлүү-төлүү салгыы атыылыы тураллар, маҕаһыыннар кииҥҥэ баар буоллахтарына, хонтуруол да баар буолуо диэн этэр. Онтон Г.Д. Попов общественность сөпкө туруорсарын, ол эрээри ыраах арыгы атыыланар буоллаҕына, араас быһыы-майгы буолуон сөбүн, боппуруос икки өрүттээх диэн этэр. А.Г. Эверстов хааччахтааһыны киллэрэбит да, билигин сылдьар арыгыһыттары кытта туох да үлэ барбат, бу бэйэбит Аммабыт дьоно буолалларын умнумуохха, кинилэри кытта үлэлииргэ туох эрэ ылыллыан наадатын бэлиэтээтэ.

Киэҥ дьүүллэһии кэнниттэн 10 депутаттан 5-һэ туттунан, 5-һэ килэмиэтири улаатыннарарга куоластаатылар. Куолас тэҥнэһэн, Устаап быһыытынан бэрэссэдээтэл 2 куоластаах буолан, килэмиэтири 300-тэн 1200 миэтэрэҕэ диэри улаатыннарарга быһаардылар. Маныаха сорох депутаттар маҕаһыыннар ыраатан ол-бу түгэн тахсар буоллаҕына дьон биһигини, депутаттары саҥарыа диэн эмиэ дьаахханалларын, дьон саҥатыгар киириэхтэрин баҕарбаттарын эттилэр.

Мин саныахпар ити курдук барытыттан куттана-сэрбэнэ, тугу эрэ киллэрэртэн туттуна сатыыр буоллахпытына, хаһан да инники хаамыахпыт суоҕа. Килэмиэтири улаатыннаран аһыы утаҕынан эргинээччилэр нэһилиэк тас өртүгэр тахсыылара син биир кыра да буоллар, бэйэтин үчүгэй өрүтүн көрдөрүө. Ону Чурапчы да улууһа дакаастаан турар. Биллэн туран бу дьаһал арыгыһыттары букатын суох оҥорон кэбиспэт. Уопсайынан дьон испэт буолуутугар кини өйө-санаата уларыйыан наада. Онон арыгылааһын аччыырыгар бу курдук хааччахтааһын биир кыра хардыы буолар. Ити курдук Амма нэһилиэгин депутаттара бэйэлэрин сессияларынан үөрэх, култуура, спорт, оҕо тэрилтэриттэн уонна дьон маассабай сылдьар сириттэн 1200 миэтэрэҕэ арыгы атыыланыыта бобулларын туһунан быһаарыы ылыннылар. Быһаарыы нэһилиэк сайтыгар уонна стендэҕэ тахсыбыт күнүттэн олоххо киирбитинэн барар.