Олоҥхо ыһыаҕын чэрчитинэн ыытыллыбыт тэрээһиннэртэн биир умнуллубат түгэнинэн олонхоһут Василий Каратаевка – Баһылай Харатайга аналлаах пааматынньык кини аатын сүгэр “Олонхо дьиэтэ” культура-этнография киинин иннигэр арыллыыта буолла.
Бэс ыйын 27 күнүгэр ыытыллыбыт тэрээһиҥҥэ В.О. Каратаев огдообото У.М. Каратаева, оҕолоро, сиэннэрэ, хос сиэннэрэ, аймахтара, Бүлүү куорат, улуус олохтоохторо, уопсастыбаннай тэрээһиннэр кыттыылаахтара, Дьокуускайтан ыалдьыттар, фольклору үөрэтэр учуонайдар, улуус дьаһалтатын салайааччылара кыттан, саҥа пааматынньык арыллыытын биһирээтилэр.
Үөрүүлээх тэрээһиҥҥэ кыттыбыт улуус дьаһалтатын баһылыга Сергей Винокуров, фольклору, олоҥхону чинчийээччи, билэлиэгийэ билимин дуоктара В.В.Илларионов,
В.О.Каратаев кыыһа А.В.Мандарова, В.О. Каратаев аатынан олонхоһуттар уонна тойуксуттар коллективтарын салайааччы С.Т.Иванова пааматынньык сабыытын арыйан бар дьоҥҥо биллиилээх олонхоһут үйэтитиллибит мөссүөнүн көрдөрдүлэр.
Баһылай Харатай олонхолуу олорорун үүт-үкчү майгыннатан норуот маастара, тимир, мас ууһа, скульптор Н.Н.Степанов оҥорбут. Пааматынньыгы көрбүт дьон скульптор үлэтин биһирээтилэр, дьоҕуруттан сөхтүлэр, үтүө тыллары анаатылар. Кини бар дьонугар бэртээхэй пааматынньыгы оҥорон бэлэхтээтэ.
Үөрүүлээх тэрээһин арыллыытыгар Саха сирин билиҥҥи кэмин бастыҥ тойуксута аатын ылбыт С.И.Иванов биллиилээх олоҥхоһукка пааматынньык турбутун тойугунан хоһуйан алгыс тылын анаабытын мустубут дьон сэргии иһиттэ.
“Оҕо тулаайах”, “Модун Эр соҕотох” олонхону сурукка түһэрэн киэҥ эйгэҕэ таһаарбыт профессор В.В.Илларионов олоҥхоһуту кытта хайдах үлэлэспитин, сыччах “Модун Эр соҕотох” олонхону үс төгүл суруйбуттарын, олоҥхоһут элбэх учуонайдары, исписэлиистэри кытта үлэлээбитин, Баһылай Харатай олоҥхолоругар Россия учуонайдара, билиилээхтэр үрдүк сыанабыл биэрбиттэрин кэпсээтэ.
Олоҥхоһут огдообото, Герой-ийэ, Бүлүү куорат Бочуоттаах олохтооҕо У.М.Каратаева Олонхо дьиэтигэр В.О.Каратаев аатын иҥэрбиттэригэр, аны дьиэ иннигэр киниэхэ анаан-минээн пааматынньык туруоран үйэтиппиттэригэр улуус дьаһалтатыгар, дьонугар-сэргэтигэр, учуонай В.В.Илларионовка долгуйан туран махтал тылларын эттэ.
В.О. Каратаев аатынан олонхоһуттар уонна тойуксуттар коллективтарын салайааччы, Саха өрөспүүбүлүкэтин культуратын туйгуна С.Т.Иванова олоҥхоһут В.О.Каратаев саха культуратыгар үйэлэргэ өлбөөдүйбэт кылаатын киллэрбитин бэлиэтээтэ, пааматынньык туруоруллуутугар скульптор Н.Н.Степанов үтүөтүн-өҥөтүн аҕынна.
Бу курдук бүлүүлэр биллиилээх олоҥхоһуттарын Баһылай Харатайы үйэлэргэ үйэтиттилэр! Кини аатын аҕыйах сыллааҕыта “Олонхо дьиэтигэр” иҥэрбиттэрэ, кини аатын сүгэр олоҥхоһуттар, тойуксуттар коллективтара айымньылаах үлэтинэн Саха сиригэр билиннэ, аны пааматынньык туруорулунна!