Баахынайга бэкээринэни чааһынай урбаанньыт Николай Николаев үлэлэтэр. Саҥа бэкээринэ дьиэтэ тутуллан бэлэм турар эрээри, быйыл эмиэ ититэр ситимэ кыаллыбатах. Онон килиэптэрин урукку дьиэлэригэр, эргэ оһохторугар астыы олороллор.
Күҥҥэ 40-ча устуука килиэп илии үлэтинэн оҥоһуллан, нэһилиэнньэҕэ тарҕанар. Нэһилиэккэ от-мас, уу-хаар таһар техника суох буолан, ууларын, мастарын барытын «Буранынан» тиэйэллэрэ кэккэ ыарахаттары үөскэтэр. Ол да буоллар Николаевтар ыарахаттартан чаҕыйан олорон хаалбаттар. Бэйэлэрин дьулуурдарынан, үлэлиир баҕаларынан иннилэрин диэки баран иһэллэр.
Килиэп астааччылар үлэлэрин күнэ сарсыарда биэс чаастан оһох оттууттан, тиэстэ мэһийиититтэн саҕаланар. «Былыргы оһох буолан, мотуора суох эргийбэт. Онон барыта тэҥҥэ буһарын курдук, температуратын эмиэ табыахха, кэтии-маныы, көрө сылдьыахха наада. Бурдукпутун «Якутопторг» сайаапкатынан ылабыт. Нэһилиньэбит ахсаана аҕыйах эрээри, холобура Кыстатыам нэһилиэгин кытта тэбис-тэҥ 9 тонна былааннаахпыт. Биһиги оҥорон таһаарарбыт 5 тонна. Аны суол аһыллан, сырыы саҕаланнаҕына, дьон килиэби атыылаһыыта эмиэ аччыыр», — диэн килиэп оҥоруутун сүрүннүүр Дария Николаева санаатын үллэстэр.
Дария Михайловна бэйэтэ Горнайтан төрүттээх. Бу дойдуга 20 саастааҕар кэлбит. 1990-2000 сс. сүөһү-ас ииттэн олорбута. Онтон уонча сыл тохтоон баран, сүөһү иитиитин сөргүтэн, дойдутуттан Горнайтан сүөһү атыылаһан, билигин биэс улахан төбөнү кыстатан турар. Онон Николаевтар үлэни өрө туппут ыал. Билиҥҥи олох ыарахаттарын аахсыбакка, килиэп астаан, сүөһү ииттэн олоҕу тыыннаан олорор дьон. Үс оҕолорун атахтарыгар туруоран, билигин ким үлэһит, ким устудьуон.
Баахынай нэһилиэгин олохтоохторо Николай, Дария Николаевтар үлэни өрө тутар үтүө өрүттэрэ холобур эрэ буолуохтарын сөп. Хамсаннахха, баҕалаах буоллахха, күүстээх үлэттэн чаҕыйбакка баран истэххэ, билиҥҥи үйэҕэ киһи тыа да сиригэр дьарыктаах, үлэлээх буолуон сөп.