Чурапчы учуутал эр дьоно оҕо иитиитигэр күүскэ ылсан үлэлиэхтэрэ

253

Сэтинньи ыйын 23 күнүгэр, Чурапчы улууһугар аан маҥнайгытын учуутал идэлээх эр киһи оҕо иитиитигэр, үөрэхтээһиҥҥэ оруолун үрдэтэр, күүһүн сомоҕолуур, үлэ уопутун тарҕатар сыаллаах форум тэрилиннэ. Уопсайа биэс араас дискуционнай былаһаакка үлэлээтэ, хас биирдии былаһааккаҕа оҕону иитиигэ туһуламмыт араас хайысхалаах, быһаарыныылаах кэпсэтиилэр таҕыстылар.


Чурапчы улууһуттан үгүс чулуу дьон үүнэн-сайдан тахсыбыттара. Үөрэх-билии аанын арыйбыт оччотооҕу бастакы учууталлар улууска үөрэх сайдыытын сахпыттара, оройуон сайдыытыгар олук уурбуттара. Саха сиригэр Чурапчытааҕы педагогическай училище чаҕылхай кадрдары иитэн-үөрэтэн таһаарбыта. Аҕа дойду Улуу сэриитин буойун-учууталлар ытык иэстэрин толорон, хорсуннук сэриилэспиттэрэ. Чурапчы киэн туттар үөрэхтээх учуонай уолаттара наукаҕа дьулуурдаахтык хардыылаан киэҥ эйгэҕэ дойдубутун ааттаппыттара.

Күн иккис аҥарыгар, “Айылгы” духуобунай сынньалаҥ киинигэр ыытыллыбыт пленарнай чааска улуус Аҕа баһылыга А.Т. Ноговицын, улуус депутаттарын мунньаҕын Сэбиэтин бэрэссэдээтэлэ Я.П. Оконешников, улуустааҕы үөрэх управлениетын начальнига Т.В. Павлова кыттыыны ыллылар. “Эр киһи диэн дьиэ кэргэн тутаах киһитэ, дьиэ кэргэнтэн дойду саҕаланар. Оскуолаҕа, уһуйааннарга үлэлиир эр дьону түмэн оҕону иитиигэ күүстээх ирдэбили туруоруохпутун баҕарабыт. Форуммут бастакы чааһа биэс сиринэн үчүгэйдик ыытылынна. Түмсүүгэ бука бары кытыннахпытына эрэ таһаарыылаах үлэ тахсыаҕа. Онон бу форумунан бүппэккэ эрэ салгыы үлэлииргитигэр ыҥырабын”, — диэтэ Тамара Васильевна Павлова.

Хас биирдии дискуционнай былаһааккаларга Дьокуускай куораттан: СР норуот педагогикатын бырабылыанньатын бэрэссэдээтэлэ, СР үөрэҕириитин үтүөлээх үлэһитэ И.И. Кондаков, Бүлүүтээҕи Н.Г. Чернышевскай аатынан педагогическай колледж педагогиканы чинчийэр лаборатория сэбиэдиссэйэ Е.К. Чиряев, автономнай коммерческайа суох үөрэхтээһини сайыннарар киин саалайааччыта Д.К. Титов кэлэн сүбэлээн-амалаан, бэйэлэрин көрүүлэрин тиэрдэн бардылар.

Форумҥа уопсайа 200-кэ педагог эр киһи кыттыыны ылла. Биэс дискуционнай былаһаакка үлэтин түмүгүнэн, эр дьон бары биир санааҕа кэлбиттэрэ бэлиэтэннэ:

1. Оҕону үлэнэн иитиигэ күүстээх болҕомтону уурарга.

2. НВП (начальная военная подготовка) предмет быһыытынан киллэрэргэ.

3. Алын сүһүөх кылааска оҕолору педагог эр киһи үөрэтиэхтээх.

4. НПК күүскэ ылсан, кыттыыны ыларга о.д.а. этиилэри С.А. Новгородов аатынан Чурапчы орто оскуолатын физическай культураҕа учуутала В.Н. Кривошапкин ааттаталаата уонна киниэхэ үөрэх управлениетын 01-04/283 нүөмэрдээх бирикээһинэн “Далаһа” диэн учуутал эр дьону биһириир, түөскэ кэтиллэр үрүҥ көмүс Бэлиэ туттарылынна.

Олоҕу саҥа анаарар,

Оҕолорго модун аал,

Одун суолга таһаарар,

Оҥоһуулаах учуутал.

Кини уран илиитигэр,

Сылаас, сымнаҕас тиһигэр,

Саҥа олоҕу тута,

Кынаттанар оҕо кута.

Үүннэрбит үнүгэстэргит,

Үөрэппит оҕолоргут,

Үлэһит үтүөтэ буолан,

Үөрүүгүт үрдүү туруохтун!