Соторутааҕыта РФ Президенэ Владимир Путин, республикабыт Ил Дархана Егор Борисов бэйэлэрин ыҥырыыларыгар тыа хаһаайыстыбатыгар кооперациялааһыны киллэрии туһунан эппиттэрэ. Бу тула Чурапчы улууһугар бэрт истиҥ, сэргэх көрсүһүү буолан ааста.
Саха сиригэр бу үлэ уопсай хаамыытын билсэ Россия тыатын хаһаайыстыбатын министерствотыттан Владимир Игорьевич Цой кэлэн республикаҕа үлэлээтэ. Үлэтин биир түгэнин биһиги улууспутугар анаабыта элбэҕи эбээһинэстиир.
Бу күн киэҥ ыҥырыылаах экономическай Сүбэ аһаҕас кэпсэтиитигэр улуус баһылыга А.Т. Ноговицын, эдэр фермердэр, нэһилиэк баһылыктара кыттыыны ыллылар. Кэпсэтии иннинэ агрокластеры сайыннарыы үлэтин номнуо кыайа туппут Мугудайдааҕы «Чараҥ» микрооройуон быыстапкатын сэргэ, чопчу кооперациялааһын курдук суолу саҥалыы технологиянан олоххо киллэрэргэ үлэлэһэ сылдьар Мындаҕаайы нэһилиэгин стендэтэ, макета бырайыак быһыытынан турда.
Кооперациялааһын билиҥҥи усулуобуйаҕа бары өртүнэн кыалларын бэлиэтээн туран, билигин бу бырайыакка биир сөптөөх нэһилиэги талан, үлэҕэ-хамнаска бэлиэр ылсан эрэллэрин улуус баһылыга бэйэтин дакылаатыгар иһитиннэрдэ.
Оттон Владимир Игорьевич бу саҕалааһын бары өртүнэн сөптөөх суолунан баран иһэрин, маннык хабааннаах үлэҕэ-хамнаска өйөбүл хайаатар да баар буолуохтааҕын, сайдыы нэһилиэк, улуус социальнай туруга тупсуутугар ол эбэтэр, республика, Россия уопсай биир кэлим сайдыытыгар күүс-көмө буолалларын тоһоҕолоон бэлиэтээтэ.