Хамаҕаттатааҕы лицей 20 сылын бэлиэтээтэ уонна спорт саала аста

175

Хамаҕаттатааҕы саха-француз оскуола 1994 сыллаахха тэриллэн, ыам ыйын 19 күнүттэн үлэтин саҕалаабыта. Онтон 1996 сыллаахха орто оскуолаттан арахсан, туспа оскуола буолбута. 2010 сылтан ыла Хамаҕаттатааҕы саха-француз лицейэ диэн статустанан, республикаҕа эрэ буолбакка, Россия үөрэҕириитин ситимигэр биир дьоһун миэстэни ылар. Үбүлүөйү көрсө саҥа спортсаала тутулунна.


Лицейгэ 15 кылаас комплегар 218 оҕо үөрэнэр. Быйыл оскуола тэриллибитэ 20 сылын бэлиэтээтилэр. Бу сыллар тухары лицейи хас эмэ сүүһүнэн оҕо бүтэрэн, анал идэлэри баһылаан нэһилиэк, улуус, республика, Россия, Европа дойдуларын араас муннуктарыгар ситиһиилээхтик үлэлии сылдьаллар.

Лицей үөрэнээччилэр чиҥ билиини ылалларыгар, эт-хаан өттүнэн сайдалларыгар, чэгиэн буола утаалларыгар төһүү күүс буолар. Ол курдук, былырыын алын сүһүөх кылаастарга анаан эбии тутуу ыытан үлэҕэ киллэрбиттэрэ. Онтон быйыл, сэтинньи 18 күнүгэр спорт саала арылынна.

Спорт сааланы бэдэрээччит Михаил Бурнашев иилээн-саҕалаан туттарбыт, онон кини спорт саала үлэҕэ киирбитин туоһулуур символическай күлүүһү лицей директорыгар Василий Эверстовка туттарда. Үөрэх министиэристибэтэ оҕолор эт-хаан өттүнэн сайдалларыгар анаан спортивнай инвентарь бэлэхтээтэ, учууталларга анал ааттары, грамоталары, махтал суруктары туттардылар.

Үөрүүлээх тэрээһиҥҥэ СӨ Үөрэҕин миниистирэ Феодосия Габышева, Ил Түмэн Государственнай мунньаҕын тутууга уонна сокуоннаска хамыһыйатын председателэ Алексей Еремеев, «Нам улууһа» МТ баһылыга Александр Атласов ыалдьыттаатылар.

Санатан эттэххэ, маннык спорт саалалар Искра уонна Арбын оскуолатыгар тутулуннулар.