Хоту дойду ыччата түмүстэ

130

Бу күннэргэ Хаҥалас улууһугар «Арктика ыччата – 2016» ыччат үөрэҕириитин иккис өрөспүүбүлүкэтээҕи форума ыытылынна. Киэҥ далааһыннаах тэрээһини СӨ Ыччат дьыалаларыгар уонна дьиэ кэргэн бэлиитикэтин министиэристибэтэ, СӨ Аҕыйах ахсааннаах хотугу норуоттар ассоциациятын Ыччатын сэбиэтэ, «СӨ педагогическай этэрээттэрэ» ыччат уопсастыбаннай хамсааһына тэрийэн ыыттылар.


Бу сылга кыттааччылар географиялара кэҥээн, «Ленский край» форумҥа Абыйтан, Аллайыахаттан, Анаабыр, Булуҥ, Дьааҥыттан, Эдьиигэн, Муоматтан, Аллараа Халыматтан, Өлөөнтөн, Орто Халыматтан, Усуйаанаттан, Эбээн Бытантайтан, Үөһээ Халыматтан, Өлүөхүмэттэн, Томпоттон, Нерюнгриттан, Алдантан, Уус Маайаттан уонна Кэбээйиттэн уопсайа 70-ча ыччат кэллэ.

Үс күн устата кыттааччыллар маастар-кылаас, араас дискуссиялары ыыттылар, федеральнай, өрөспүүбүлүкэтээҕи таһымнаах уорганнар, тэрилтэлэр исписэлиистэрин кытары көрүстүлэр. Форум хотугу аҕыйах ахсааннаах норуоттар этническэй култууралара, этноспорт уонна чөл олох, инновация уонна предпринимательство, экология, Арктиканы сайыннарыы диэн хайысхаларынан ыытылынна. Бастыҥтан бастыҥ кыттааччылар СӨ Ыччат дьыалаларыгар уонна дьиэ кэргэн бэлиитикэтин министиэристибэтин аатыттан 2017 сылга ыытыллар федеральнай ыччат үөрэҕириитин форумугар кыттар сетрификатын туттулар.

Булуҥ Күһүүрүттэн кэлэ сылдьар Валерия Пинигина тэрээһин кэнниттэн улуус ыччатын землячествотын сөргүтэр туһунан санааҕа кэлбитин эттэ.
Онтон Уус Маайа бэрэстэбиитэлэ Анатолий Вако: «Бу форумҥа бастакы кыттыыбыт. Биһиги хоту улуустар ахсааннарыгар киирбэппит. Ол эрээри биһиэхэ аҕыйах ахсааннаах норуоттар түөлбэлээн олорор сирдэрэ баар. Бэртээхэй тэрээһин буолла. Элбэҕи биллибит көрдүбүт», – диэн санаатын үллэһиннэ.

СӨ Ыччат дьыалаларыгар уонна дьиэ кэргэн бэлиитикэтин миниистирин солбуйааччы Василина Лукина хотугу ыччаттар инникигэ эрэллээхтэрин, оҥорбут бырайыактарын ситиһиилээхтик көмүскээбиттэрин Саха информационнай агентствоҕа бэлиэтээн эттэ.