Быйылгы сыл Өлөөн олохтоохторугар ураты элбэх бэлиэ түгэни тосхойдо. Тыа сирин дьонугар ыраахтан-чугастан араас идэлээх дьон кэлэн ыалдьыттаан бараллара умнуллубат үөрүүнү аҕалар. Ол курдук, бу күннэргэ Дьокуускай куораттан «Саха» НКИХ суруналыыһа, «Толкуйдаа. Оонньоо. Кыай.» ток-шоуну ыытааччы Олег Колесов – Талбан кэлэн мындыр толкуйу, өйү сытыырхатар оонньууну ыытта.
Оонньууга түөрт хамаанда күөн көрүстэ. Бастакыга Өлөөн орто оскуолатын үөрэнээччилэрин “Винер” хамаандата Харыйалаах орто оскуолатын учууталларын “Кустук” хамаандатын утары кииристилэр. Хара саҕаланыаҕыттан икки өттүттэн сытыы киирсии буолла. Илин-кэлин түсүһүү, тардыалаһыы кэнниттэн биэтэккэ учууталлар кыайыылаах таҕыстылар. Манна Өлөөн орто оскуолатын быйыл бүтэрээри сылдьар кыргыттар тобуллаҕас сытыы толкуйдаахтарын, санааларын сөпкө тиэрдэн этэллэрин көрдөрдүлэр. Иккис оонньууга “1969 сыллаахтар” диэн бэтэрээннэр уонна “Улыбка” киин библиотека хамаандалара күөн көрүстүлэр. Бу сырыыга “улыбкалар” кыайаннар, бастакы кыайыылааҕы — “кустугу” утары кииристилэр. Түмүккэ “Улыбка” чорбойон, хамаанда чилиэннэрэ кыайыы өрөгөйүн оройуттан туттулар.
«Т.О.К.» оонньууга доруобуйаларынан хааччахтаах дьоҥҥо ыытыллыбыт декада кыттыылаахтара Анастасия Томская, Мария Бятинская, Николай Комбагир уустук боппуруостарга сөптөөх хоруйдары биэрэн, кинилэргэ «ыалдьааччылар» ытыстарын тыаһынан арыалланнылар. Бу киэһэ дохсун ытыс тыаһыгар доҕуһуоллатан оонньууга кыттыбыт хамаандалар бары «Саха» НКИХ өйдөбүнньүк бэлэхтэрин туттулар. Сынньалаҥ киэһэтин Өлөөн көмүс куоластаах ыччаттара ыллаан-туойан киэргэттилэр.
Ыалдьыппыт, саха телевидениетын суруналыыһа Олег Колесов-Талбан маннык туһалаах бырайыагынан өрөспүүбүлүкэбит дьонун-сэргэтин, ордук ыччат төрөөбүт сахатын тылын билэригэр, өйдүүр, толкуйдуур дьоҕуру сайыннарарга сөптөөх биэриини ыытара хайҕаллаах. Талбан биһиги хотугу кыраайбытыгар бастакы сырыыта.
—Өлөөн сайдыылаах улуус диэн сыаналаатым. Эдэр ыччата үөрэххэ, үлэҕэ дьулуурдааҕа, үлэһитэ, ыалдьытымсаҕа улаханнык үөртэ, долгутта. Айылҕата остуоруйа дойдутун курдук эбит. Ото-маһа кырыанан бүрүллэн ураты кэрэ. Олохтоох эбэҥки табаһыттарын, булчуттарын олохторун кэпсиир кыраайы үөрэтэр музейы олус сэргээтим, баай экспонатын астына көрдүм. «Өлөөн» МУТ табаһыта Христофоров Прокопий Павлович, тыа хаһаайыстыбатын исписэлииһэ Тааттаттан төрүттээх күтүөт Колодезников Конон Иннокентьевич таба ыстаадатыгар бараары тэринэ сылдьалларын көрсөн уһуллум. Кинилэр өбүгэ саҕаттан таҥнар таба таҥастарын кэтэ сылдьалларын сөҕө-хайгыы көрдүм. Ыал ийэтэ иистэнэр буолан табаһыттар, булчуттар билигин даҕаны маннык таҥаһы сөбүлээн кэтэр буоллахтара. Тыйыс тымныылаах, кылгас сайыннаах дойдуга ынах иитиитинэн дьарыктанан эрэр эдэр ыал Анна, Афанасий Зоркиннар хаһаайыстыбаларыгар сырыттым. Элбэх тэрилтэ үлэтин-хамнаһын билистим, бэйэбэр туһалаах матырыйааллары хомуйдум. Өлөөннөргө «ТОК» оонньууну ыыппыппыттан, олохтоохтор көхтөөхтүк кыттыбыттарыттан улаханнык астынным, — диэн санаатын үллэһиннэ.