Сулууспаларын эбээһинэһин толоро сылдьан өлбүт ис дьыала уорганнарын үлэһиттэрин кэриэстээтилэр

403

Сэтинньи 8 күнэ – РФ Ис дьыала миниистирин бирикээһинэн сулууспаларын эбээһинэһин толоро сылдьан өлбүт ис дьыала уорганнарын үлэһиттэрин кэриэстээһин күнүнэн биллэриллибитэ. Бу күн чэрчитинэн Нам улууһугар хорсун быһыы скверигэр миитин буолла.


Сулууспаларын эбээһинэһин толоро сылдьан өлбүт ис дьыала уорганнарын үлэһиттэрин мемориальнай дуоскаларыгар гирлянда, сибэкки дьөрбөтүн уурдулар. Кинилэр сырдык кэриэстэригэр анаан үс төгүл аптамаатынан ыттылар.

Миитиҥҥэ Намнааҕы ис дьыала отделын үлэһиттэрэ уонна бэтэрээннэрэ, сулууспаларын эбээһинэһин толоро сылдьан сырдык тыыннара быстыбыт ЛРР инспектора, милиция капитана Леонид Иванов ийэтэ Екатерина Лукинична, ДПС инспектора Альберт Москвитин аҕата Афанасий Егорович, холуобунай ирдэбил оперативнай боломуочунайа, полиция майора Петр Васильев огдообото Надежда Егоровна уо.д.а. кытыннылар.