СӨ Олох-дьаһах, коммунальнай хаһаайыстыба уонна энергетика министерствота нэһилиэнньэлээх пууннары тупсарыныы сылынан ыыппыт куонкуруһар Нам улууһуттан 8 нэһилиэк 4,5 мөлүйүөннээх грант ылан, үгүс хайысхалаах үлэлэри ыыттылар. Онтон биирдэстэринэн Бөтүҥ нэһилиэгэ буолар.
Нам улууһун Бөтүҥ нэһилиэгэр лохтоох дьаһалта үлэһиттэрэ, депутаттара, общественность – бары бииргэ түмсэн нэһилиэк тупсарыгар араас өрүттээх үлэ ыыттылар.
Сэтинньи 3 күнүгэр тупсарыныы сылынан ыытыллыбыт үлэлэртэн биир улаханнарынан нэһилиэккэ киириигэ «Боотур» стелланы үөрүүлээхтик аһыы тэрээһинэ буолла. Үөрүүлээх тэрээһиҥҥэ «Нам улууһа» МТ баһылыгын экономикаҕа уонна үпкэ солбуйааччыта Марина Обутова, тыа хаһаайыстыбатыгар уонна предпринимательствоҕа солбуйааччы Ефим Гоголев, «Модут нэһилиэгэ» МТ баһылыга Петр Сокольников, «Искра нэһилиэгэ» МТ баһылыга Петр Абрамов, «Ленскэй нэһилиэк» МТ баһылыгын солбуйааччы Павел Федоров, «Партизан нэһилиэгэ» МТ баһылыгын солбуйааччы Полина Скрябина уо.д.а. кытыннылар.
Михаил Макаров, «Бөтүҥ нэһилиэгэ» МТ баһылыга: «Граҥҥа кыттан, субсидия ыламмыт араас хайысхалаах үлэни ыыттыбыт. Ол курдук, Чоомуос кварталга оҕолор оонньуулларыгар былаһаакка туруордубут. «Ади-Строй» тэрилтэнэн административнай-культурнай киин иннигэр транспорт тохтобулугар анаан асфальтынан анал миэстэ оҥоттордубут. Чоомуос кварталга суол оҥоттордубут уонна уот ситимин таттардыбыт. Школьная уулуссаҕа турар спортивнай былаһаакканы, Михаил Макаров аатынан уулусса тула үүнэр хатыҥ чараҥы, сынналаҥ паарка тулатын күрүөлээтибит. Уулуссаны сырдатар лаампалары уларыттыбыт, уулуссалар ааттарын уонна нүөмэрдэрин оҥотторон ыйаатыбыт. Маны таһынан нэһилиэккэ киириигэ «Боотур» стелланы оҥорон туруордубут. Стелла ааптарынан Художниктар союзтарын чилиэнэ, скульптор, Намнааҕы педагогическай колледж преподавателэ Николай Огонеров буолар», — диэн санаатын үллэһиннэ.