Нам улууһугар СӨ бастакы бэрэсидьиэнэ, СӨ судаарыстыбаннай сүбэһитэ Михаил Николаев кэлэ сырытта. Үөрэх тэрилтэлэригэр, сүөһү өлөрөр сыахха сылдьан үлэ-хамнас хаамыытын билистэ, улуус дьаһалтатын, нэһилиэк баһылыктарын кытта көрсөн кэпсэттэ.
Күндү ыалдьыт И.Е.Винокуров аатынан Намнааҕы педагогическай колледж устудьуоннарын, Н.С.Охлопков аатынан улуустааҕы гимназия үөрэнээччилэрин кытта көрүстэ. Гимназистары кытта кэпсэтиигэ оҕолортон төрөөбүт улуустарын сайдыытын туһугар үлэлэһэр инниттэн туох идэни талар былааннаахтарын ыйыталаста. Дойду, өрөспүүбүлүкэ сайдыыта оҕону сөптөөхтүк иитииттэн саҕаланарын бэлиэтээтэ.
«2022 сылга Саха өрөспүүбүлүкэтин автономиятын 100 сыла буолар. Бу саха норуотун историятыгар көмүс буукубанан суруллубут бэлиэ даатаны хайдах, туох ситиһиилээх, уларыйыылаах көрсөбүт диэн боппуруос барыбытын долгутар. Сайдыыны, үлэ тэтимин түргээтэтии, күүспүтүн-уохпутун, кыахпытын хаҥатыы – бу биһиги инники үлэбитигэр, олохпутугар турар соруктарбыт”, — диэтэ кини.
Улуус салалтатыгар көрсүһүү Михаил Ефимовиһы төрөөбүт күнүнэн эҕэрдэлээһинтэн саҕаланна. Салгыы ыытыллыбыт мунньахха улууска барар үлэни-хамнаһы сырдаттылар, кэккэ боппуруостарга тохтоотулар. Маннык көрсүһүүлэргэ сылдьыбыт дьон Михаил Ефимович ураты, дириҥ ис хоһоонноох көрүүлэрин, сайдыыга ыйар суолларын истэннэр сүргэлэрэ көтөҕүллэрэ, үлэҕэ саҥа тыын ылаллара саарбаҕа суох.