Күүтүүлээх бырааһынньыкпыт — Саҥа дьыл — чугаһаатар-чугаһаан иһэр. Ол туоһутунан дьиэлэргэ, тэрилтэлэргэ, уулуссаларга араас өҥнөөх гирляндалар уоттара сандаараллар, киин болуоссаттарга Харыйалар тураллар.
Ааспыт нэдиэлэҕэ Орто Халыма куоракка “Спектр” оҕо сайдар киинигэр инбэлиит уонна доруобуйаларынан хааччахтаах оҕолорго Саҥа дьыллааҕы бырааһынньык буолан ааста.
Киин үлэһиттэрэ бары (дириэктэр А.П. Тарасова) маскарадтанан, сылаас уйаларыгар оҕолорго ураты алыптаах эйгэни тэрийдилэр. Кэлбит оҕолор эмиэ араастык таҥнан-симэнэн, хаар киһи, үрүҥ эһэ буолан Дьэгэ-бааба көрдөөх оонньууларыгар кытта кыттыстылар, бириистэри туттулар.
Киин биир хоһугар оҕолорго анаан бырааһынньыктааҕы остуол тардылынна, манна Оҕоҕо уонна дьиэ кэргэҥҥэ көмө киинин үлэһиттэрэ сатабылларын, истиҥ баҕа санааларын ууран туран астаабыт минньигэс, кэлэр сыл бэлиэлээх тортара остуолу киэргэттэ.
Оҕолорго Саха сиринээҕи “Харысхал” аһымал фонда бэлэмнээбит бэлэхтэрин туттардылар. Быйылгы бэлэх уратылаах буолан биэрдэ, сахалыы үс остуоруйалаах, Чысхааны кытта хаартыска түһэргэ анал бырагыраамалаах, остуол оонньуулаах уонна, биллэн турар, минньигэс кэмпиэттээх, сакалааттаах.