Орто Халымаҕа судаарыстыбаннай тэрилтэлэр уонна уопсастыбаннай хааччыйыы үлэһиттэрин Бүтүн Арассыыйатааҕы идэлээх сойуустарын 95 сыллаах үбүлүөйүнэн куонкурус ааттааҕа буолла. Манна улуустааҕы идэлээх сойуустар бөлөхтөрүн бэрэссэдээтэллэрэ кытыннылар.
Судаарыстыбаннай тэрилтэ идэлээх сойууһугар улуус дьаһалтатыттан: отделлар, муниципальнай баайы-дуолу салайар ааҕыныстыба, муниципальнай тэрилтэлэр үлэлэрин хааччыйар ааҕыныстыба, биир кэлим диспетчерскэй сулууспа (бэрэссэдээтэл Е.Слепцова); социальнай харалта управлениета (бэр. Л.Лащик); оҕоҕо уонна дьиэ кэргэҥҥэ социальнай көмө киинэ (бэр. Л.Солдатова); ветеринарнай управление (бэр. Г.Сивцева); айылҕа харыстабылын инспекцията уонна «Халыма» айылҕа паарката (бэр. Н.Бурнашова); Судаарыстыбаннай тэрилтэлэр: статистика отдела, дьарыктаах буолуу киинэ, үп управлениета, тыа хаһаайыстыбатын управлениетын исписэлиистэрэ (Г.Михайлова). Уопсайа алта идэлээх бөлөх баар. Оттон балары холбоон, улуустааҕы идэлээх сойуус бэрэссэдээтэлинэн «Халыма» айылҕа пааркатын үлэһитэ Матрёна Калачёва буолар. Күн бүгүн сойууска 284 чилиэн баар.
Куонкуруска үс бэрэссэдээтэл биэс түһүмэххэ куоталаста. «Мин үлэм» түһүмэххэ бэйэлэрин идэлэрин, туох үөрэхтээхтэрин, төһө өр үлэлээбиттэрин, үлэҕэ-хамнаска туох ситиһиилээхтэрин билиһиннэрдилэр. Иккискэ бииргэ үлэлиир кэллэктииптэрин сырдаттылар. Манна сүрүн болҕомто идэлээх сойуус үлэтигэр, бииргэ алтыһыыга туһаайылынна. Үһүскэ бу сайын ханна сынньаммыттарын кэпсээтилэр. Салгыы сөбүлүүр дьарыктарын туһунан сэһэргээтилэр. Тиһэх түһүмэххэ дьиэлэригэр бэлэмнээн аҕалбыт бүлүүдэлэрин сыаналаттылар.
Улуустааҕы дьаһалта тэрилтэлэрин бэрэссэдээтэлэ Елена Слепцова, айылҕа харыстабылын иниспиэксийэтин уонна «Халыма» айылҕа пааркатын бэрэссэдээтэлэ Наталья Бурнашова, оҕоҕо уонна дьиэ кэргэҥҥэ социальнай көмө киинин бэрэссэдээтэлэ Лариса Солдатова бу күн туох баар дьоҕурдарын, сатабылларын көрдөрдүлэр.
Түмүккэ бастыҥ үлэлээх идэлээх сойууһунан улуус дьаһалтатын сойууһа ааттанна. Кини кэнниттэн оҕоҕо уонна дьиэ кэргэҥҥэ социальнай көмө киинэ, салгыы айылҕа харыстабылын инспекцията уонна «Халыма» айылҕа паарката буоллулар. Кинилэргэ улуустааҕы сойуустан харчынан бириэмийэ туттарылынна. Оттон бастыҥ бэрэссэдээтэл аатын ылбыт Елена Слепцоваҕа анал кубок туттарылынна. Иккис миэстэҕэ Лариса Солдатова, үһүскэ Наталья Бурнашова тигистилэр. Маны сэргэ, хас биирдии кыттааччыга анал номинациялар олохтоннулар, сыаналаах бэлэхтэр туттарылыннылар.