Уус Алдан улууһун Мүрү 2-с №-дээх орто оскуолатын 10 «а» кылааһын үөрэнээччилэригэр сэргэх күннэр буоллулар. Оҕолор Тандаҕа РФ Үлэ Геройа, СӨ бочуоттаах олохтооҕо Михаил Готовцевы баран көрүстүлэр. Бу туһунан кылаас салайааччыта Ирина Сыроватскаяттан иһиттибит.
-«Образование на колесах» бырайыакпынан салайар кылааһым оҕолорун билиилэрин-көрүүлэрин хаҥатар сыаллаах-соруктаах улуус, өрөспүүбүлүкэ бэлиэ миэстэлэринэн сырытыннарар, үлэһит дьоннуун көрсүһүннэрэр үгэстээхпин. Бу төрдүс выпуһум оҕолорун Тандаҕа РФ Үлэ Геройун Михаил Николаевич Готовцевы кытта көрүһүннэрдим. Оҕолор 100-тэн тахса сүөһү турар комплекс-хотонугар сырыттылар, үлэни-хамнаһы билистилэр, — диир Ирина Петровна.
Сэбиэскэй Сойуус саҕана үлэҕэ уһулуччу үрдүк көрдөрүүлэри ситиспит, үрүҥ илгэни үрүлүппүт ыанньыксыт кэпсээнин оскуола үөрэнээччилэрэ сыыска-буорга түһэрбэккэ болҕойон истибиттэр. Итиэннэ чахчы да ыарахантан чаҕыйбакка уһулуччу бэриниилээхтик үлэлээбитин, кыһамньылааҕын сөхпүттэр. Сибиэһэй ас-үөл хайдахтаах сыраттан кэлэрин сөхпүттэр, сыаналаабыттар. «Сүрэхтээх киһини үлэ киэргэтэр эбит» дэспиттэр. Ытык киһиэхэ бэрт элбэх ыйытыыны биэрбиттэр.
Салгыы историяны, кыраайы үөрэтэр Иван Готовцев аатынан мусуойга сылдьыбыттар. Оскуолаҕа ыалдьыттаабыттар. Саастыылаахтарын кытта билсибиттэр, кылааһынан сибээһи тутуһарга быһаарыммыттар. Мүрүгэ төннөн иһэн айылҕа сибиэһэй салгынынан тыыммыттар, көмүрүө хаарга сырсыбыттар, төрөөбүт дойдуларын сирин-уотун туһунан сэһэргэспиттэр. Ирина Петровна маннык сырыы-айан оҕолорго үлэни-хамнаһы билэ, сыаналыы улааталларыгар көмөлөөҕүн, сири-дойдуну ытыгылыы үөрэнэллэригэр, сиэрдээх буолалларыгар сирдиирин бэлиэтиир.