Сэтинньи 14 күнүгэр Ньурба куоратыгар 24-түү Мегаватт кыамталаах «Амакинка», Вертолёткаҕа «Новая-1» хочуолунайдар үөрүүлээх аһыллыылара буолла.
«Амакинка» хочуолунай үөрүүлээх аһыллыытыгар СӨ ОДьКХ ГУП ген. директора, Ил Түмэн депутата Ноговицын А.А, «Ньурба оройуон» МО баһылыга Попов Б.Н. СӨ ДьКХ Ньурбатааҕы филиалын директора Тихонов А.С., «Строймонтаж -2002» ХЭО ген.директора Приходько Р.В., ГУП ОДьКХ директорын бастакы солбуйааччыта Соколов А.П. үөрүүлээх быһыыга-майгыга аалай лиэнтэни быстылар. СӨ ОДьКХ генеральнай директора Ноговицын А.А. мустубут дьону эҕэрдэлээн туран, 6-7 сыл анараа өттүгэр баһылык Прокопьев В.М. ОДьКХ боппуруоһугар мунньах ыытан, квартальнай хочуолунай тутуутугар былаан ылыныллыбытын, ОДьКХ ГУП Инвестпрограмманан Европатааҕы саҥардан оҥоруу уонна сайыннарыы баанын кредитин суотугар 760 мөл. солк. суумалаах хочуолунай тутуллубутун билиһиннэрдэ. Салгыы үөрүүлээх быһыыга-майгыга Бочуотунай грамоталары «Строймонтаж 2002» ген.директорыгар Приходько Р.В., ГУП ОДьКХ директорын бастакы солбуйааччытыгар Соколов А.П., «Амакинка» хочуолунай силиэсэригэр Кочнев А.В. Маны таһынан Махтал суруктары «Амакинка» хочуолунай транспортировщигар Борисов А.В. тракторист Семенов А.С. үөрүүлээх кэмҥэ туттартаата.
Улуус баһылыга Попов Б.Н.эҕэрдэ тыл этэн туран, улууска социальнай-экономическай сайдыыга кылаатын иһин түөскэ анньыллар бэлиэни Соколов А.П., Ньурба оройуонун Бочуотунай грамотаны «Амакинка» кочегар-машиниһыгар Степанов В.А. түгэҥҥэ түбэһиннэрэн туттартаата. Ил Түмэн Мунньаҕын депутата Григорьева А.А. улахан объект аһыллыбытынан эҕэрдэ тыл эттэ.
Үөрүүлээх аһыллыы буолуон аҕай иннинэ саҥа тутуллубут объегы көрө киирэн, туһааннаах үлэһити, «Амакинка» учаастагын салайааччыта Степанов Владимир Петровиһы кытары көрсөммүн үлэ хаамыытын билсистим:” Симиэнэҕэ 4 буолан тураллар, биирдии симиэнэҕэ 2 хачыгаар, 2 транспортировщик, манна эбии автоматиканы көрөр 1 электрик, 5 силиэсэр- өрөмүөннээччилэр, 2 теплотрасса көрөр силиэсэрдээхпит, 1 сварщик, 1 маастар буолан үлэлиибит. Биһиги учаастакпыт урукку: Верхнэй Амакинка, Киин, Ньурба 1 №-дээх хочуолунайдары солбуйар. Дьабарыкы Хайа чоҕунан оттобут. Билиҥҥи туругунан бэдэрээччиттэр тэриллэри аҕалан таҥа сылдьаллар. Учебнай комбинаттан кэлэн кочегар-машинист, силиэсэр идэлэргэ квалификацияны үрдэтиигэ кэлэн үөрэттилэр. Билиҥҥитэ үлэлииргэ усулуобуйа баар”.
ГУП ОДьКХ бастакы солбуйааччыта Соколов Александр Петрович: «Биһиги алта сыл тухары 200-тэн тахса объектары туттубут. Уопсайа 11 миллиартан тахса суумалаах үлэни толордубут«, — диэтэ.
Салгыы Вертолёткаҕа баар «Новая-1» хочуолунай үөрүүлээх аһыллыытыгар СӨ ОДьКХ ГУП ген.директора Ноговицын А.А., «Ньурба оройуон» МО баһылыга Попов Б.Н., СӨ ДьКХ Ньурбатааҕы филиалын директора Тихонов А.С., «Ньурба куорат» МТ СЭГХ салайааччыта Семенов М.С. эҕэрдэ тыл эттилэр. «Вариант+» ХЭТ ген.директора Говоров И.В. символическай күлүүһү Тихонов А.С. үөрүүлээх быһыыга-майгыга туттарда. Улуус дьаһалтатын баһылыгын Бочуотунай грамотанынан «Новая -1» электросварщига Николаев Р.В., «Вариант+» ХЭТ прораба Попов Е.П.наҕараадаланнылар.
Үөрүүлээх түгэн кэмигэр Ньурба куорат, Амакинка түөлбэ эдэр олохтооҕо Олесова Светлана Васильевна СӨ Ил Дарханыгар Борисов Е.А. Ньурба улууһугар улахан кыамталаах хочуолунайдары бэлэхтээбитин иһин барҕа махталын тиэртэ.
«Бу икки улахан баараҕай хочуолунайдар кырата 50 сыл сылааһы биэриэхтэрэ«, — диэн ОДьКХ Ньурбатааҕы филиалын директора Тихонов А.С. этиитинэн түмүктээтэҕим буоллун.
