Муус устар бүтүүтэ улуустааҕы киин бибилэтиэкэҕэ СӨ үтүөлээх тренера, хотугу многоборьеҕа РФ уонна СӨ спордун маастара, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ, «Азия оҕолоро» пуонда стипендиата, «Сахаада-спорт» ассоциация лауреата, улуус бочуоттаах олохтооҕо Константин Николаевич Туприн олоҕун уонна үлэтин кэпсиир «Хоту дойду чулуу уола» диэн кинигэ сурэхтэниитэ буолла.
Бу бэрт тупсаҕайдык оҥоһуллубут кинигэни Уруҥ Хайа орто оскуолатын социальнай педагога, СӨ үөрэҕириитин бочуоттаах бэтэрээнэ Н.П.Туприна сүрдээҕин дьаныһан туран араас сылларга хаһыакка тахсыбыт ыстатыйалары хомуйан, дьон ахтыыларын сыа-сым курдук тутан, сорохторуттан сирэй көрсөн кэпсэтэн сурукка-бичиккэ тиһэн, долган норуотун киэн туттар чулуу спортсменын Константин Туприн аатын үйэтиттэ. Айымньылаахтык үлэлээн дьоһун кинигэни, Дьокуускай куоракка «Медиа-холдинг Якутия» кинигэ кыһатыгар 250 ахсаанынан бэчээттэтэн бар дьонугар бэлэх уунна. Тэрээһиҥҥэ Константин Николаевиһы кытта үлэлэринэн алтыспыт дьон, бииргэ үөрэммит үөлээннээхтэрэ, аймах-билэ дьоно кэлэн кыттыыны ыллылар. Тэрээһини иилээн-саҕалаан ыытта кинигэ ааптара Надежда Прокопьевна. Кинигэ сурэхтэниитигэр мустан олорооччулар бары Константин Николаевич улууска хотугу многоборье көрүҥэ сайдыытыгар сүҥкэн оруоллааҕын, ыччаты спортка уонна чөл олоххо уһуйууга туохха да тэҥнэммэт кыһамньытын уурбутун, спорт бу көрүҥэр элбэх спорт маастарын иитэн таһаарбытын ордук тоһоҕолоон эттилэр. Олохторугар алтыспыт кэрэ бэлиэ кэмнэрин ахтан-санаан ыллылар. Маны таһынан, мультимедийнай дуоскаҕа бииргэ үлэлээбит доҕотторун, үөрэнээччилэрин ахтыыларыттан таҥыллыбыт киинэни көрдүбүт. Тэрээһин бүтүүтүгэр улуус дьаһалтатын аатыттан социальнай боппуруостарга баһылыгы солбуйааччы Н.А.Спиридонова, Надежда Прокопьевнаҕа үөрүүлээх быһыыга-майгыга Махтал суругу туттарда. Түмүккэ улуустааҕы кыраайы үөрэтэр уонна этнография музейын спортивнай чыпчааллары кэрэһилиир анал хоһугар Константин Туприн истиэндэтин таһыгар элбэх махтал тыллардаах кэпсэтиинэн тэрээһин түмүктэннэ.