Анаабыр улууһугар тутуу үлэтэ тэрээһиннээхтик ыытыллар буолла. Ол курдук, аныгы үйэ технологиятынан панелларынан оҥоһуллар дьиэлэри тутууну «Анаабыр Алмаастара» ААУо иһинэн үлэлиир «Алмас» ХЭТ тэрилтэ быйыл сааскыттан саҕалаабыта.
Тэрилтэ бастаан хоту дойду кылгас сайынын баттаһа, 8 кыбартыыралаах толору хааччыллыылаах икки этээстээх дьиэни кылгас кэм иһигэр тутан дьэндэтэн таһаарбыта. Аҕыс ыал саҥа дьиэлэр күлүүстэрин тутар дьолломмуттара. Тутуу биригэдьиирэ И.Е.Захаров кэпсээбитинэн, маннык панелларынан тутуллубут дьиэ буруус маһынан тутуллубут дьиэттэн уратыта диэн олох түспэт. Этэргэ дылы «под ключ» туттуҥ да, үгүс бириэмэни сүтэрбэккэ, дьиэҕэр олоро киириэххин сөп. Үлэһиттэр аны 12 кыбартыыралаах икки этээстээх дьиэни тутууну саҕалаабыттара.
«Алмас» ХЭТ үлэһиттэрэ бары күүһү уонна сатабылы түмэн, дьиэ аҕыйах кэм иһигэр тутулла охсон, аллараа бөһүөлэги киэргэтэр биир баараҕай тутуунан киэркэйэн таҕыста. Дьон-сэргэ саҥа дьиэҕэ киирэр үөрүүтүн үллэстээри, ахсынньы 23 күнүгэр дьиэ күлүүстэрин үөрүүлээх быһыыга-майгыга туттарыы сиэрэ-туома буолла.
Эрдэ дьиэни үллэлэр хамыыһыйа, дьиэлэри аттарбытынан 6 кыбартыыра үлэ уонна тыыл бэтэрээннэригэр бэриллибитэ. Онтон атына дьиэҕэ-уокка олус наадыйар дьоҥҥо ананна. Тэрээһин сиэрин-туомун ылбаҕай тылынан-өһүнэн алҕаата К.А.Андросов. Тэрээһини Г.Д.Цыбикова тэрийэн ыытта. Аалай кыһыл лиэнтэни улуус баһылыгын бастакы солбуйааччыта В.В. Зедгенидзев уонна Сааскылаах нэһилиэгин баһылыга Е.И.Лаптев быстылар.
Саҥа дьиэ хаһаайыннара буоллулар, үлэ уонна тыыл ветераннара М.М.Лукинова, М.В.Степанова, М.И.Хоноехова, Ф.М.Капитонова, Т.М.Андросова, Н.А.Семенников уонна аҕа саастаах Н.Ф.Егорова. Итини кытта олорор дьиэни тупсарыы уонна хаарбах дьиэттэн көһөрүү бырагыраама чэрчитинэн Цыбиковтар, М.А. Боярская уонна С.С. Спиридонов, В.Е. Андросова, Л.В. Егорова, В.В. Корякина саца дьиэ күлүүстэрин тутан үөрдүлэр-көттүлэр.
Эҕэрдэ тыл эгэлгэтэ этиллибитин кэннэ, эт илиилэринэн тутан-хабан, сөҕөн-махтайан дьиэни туппут үлэһиттэргэ уонна улуус баһылыгар И.М.Семеновка махтал тыл бастыҥын анаатылар.