Ааспыт субуотаҕа Сунтаардааҕы технологическай колледж дьиэтигэр «Чэбдик» кулууп 15 сыллааҕы үбүлүөйүн бэлиэтээтилэр. Үгүс нэһилиэккэ сылдьан лиэксийэлэри, маастар-кылаастары ыыталлар. Билиҥҥитэ 17 туһааннаах дьаһал буолбут.
Биэчэри тэрийээччинэн уонна сүрүн дьоруойунан биир интэриэстээхтэрин бэйэтин тула түмпүт, Сунтаар улууһун Бочуоттаах гражданина, Арассыыйа, СӨ бэтэрээннэргэ успуорт маастара Варвара Макарова-Сүүрүк Балбаара буолла.
Кулууп чилиэннэрин эҕэрдэлии үгүс киһи кэлбит. Ол курдук бэйэлэрин итии-истиҥ эҕэрдэлэрин Сунтаар нэһилиэгин баһылыга Эдуард Филиппов, улуус дьаһалтатын физическэй култуураҕа уонна успуорка отделын начаалынньыга Семен Павлов, Сунтаардааҕы С.А.Зверев-Кыыл Уола аатынан норуот айымньытын мусуойун исписэлииһэ Иван Евсеев, норуот ырыаһыта, тойуксут Мария Егорова-Тойуктаах Маарыйа, улуустааҕы кииннэммит библиотечнай ситим ааҕааччыны кытта үлэҕэ отделын исписэлииһэ Камилла Афанасьева уо.д.а. тириэртилэр.
Кулууп 15 сыллаах устуоруйатын туһунан сиһилии видеороликтары, хаартыскалары көрдөрө-көрдөрө Лидия Евсеева кэпсээтэ.