«Партизан» култуура киинигэр «Чебурашка» оҕо сайдар киинин иитиллээччилэрин толорууларыгар эбээн оҕо суруйааччыта Мария Федотова-Нулгынэт «Истиҥ таптал» остуоруйатынан испэктээктэрэ буолан ааста. Испэктээги В. Николаев аатынан Сунтаардааҕы норуодунай тыйаатыр режиссера, СӨ култууратын үтүөлээх үлэһитэ Татьяна Заровняева туруорда.
«Чебурашка» оҕо саада 2008 сылтан саҕалаан, Сунтаардааҕы норуот тыйаатырын кытта ыкса сибээстээхтик үлэлиир. Ол курдук оскуолаҕа киирэргэ бэлэмнэнэр бөлөх иитиллээччилэрэ сылын аайы араас омук остуоруйаларын туруоран көрдөрөллөр. Ааспыт уон сыл иһигэр оҕолор Шарль Перро «Золушкатын», Гофман «Щелкунчигын», саха норуодунай бэйиэтэ Эллэй «Чурум-Чурумчукутун», Джонни Родари «Чиполлинотын» о.д.а. ааптардар остуоруйаларын туруоран, улахан сыанаттан көрөөччүлэр дьүүллэригэр таһаардылар. Маннык тэрээһин үтүө үгэскэ кубулуйбут.
Бу сырыыга испэктээккэ 37 оҕо оонньоото. Остуоруйа ис хоһооно маннык. Кыра кыыс Айко бултуу барбыт сүппүт аҕатын хас да сыл көрдөөн буларын туһунан. Ол сырыытыгар кини үгүс мэһэйи көрсөр, тоҥор-хатар. Дьиэтигэр кинини ийэтэ, дьүөгэлэрэ долгуйа күүтэллэр. Остуоруйаҕа араас кыыллар, көтөрдөр (табалар, бөрөлөр, кыталыктар) бааллар.
Испэктээккэ үҥкүүнү хореограф Василина Слепцова туруорда. Оҕолор бары бэйэлэрин оруолларын олус бэркэ толордулар. Уота-күөһэ да табылынна.
Сүрүн оруоллары толорбут оҕолору ахтан ааһар тоҕоостоох. Ол курдук Айкону Василиса Соловьева, кини аҕатын Марк Хастыров, ийэтин Нарыйаана Федорова оонньоон көрдөрдүлэр. Остуоруйаһытынан Мария Тимофеева буолла.
Испэктээк киэҥ эйгэҕэ тахсарыгар улахан өҥөлөөх дьонунан оҕолор иитээччилэрэ Алена Ксенофонтова, Надежда Павлова уонна Наталья Иванова буолаллар. Кинилэр оҕолору түмэн, сааһылаан бэлэмнээбиттэрэ ситиһии төрдө буолбута чуолкай.
Тэрээһин түмүгэр сыанаҕа улуустааҕы үөрэх управлениетын оскуолаҕа киириэн иннинээҕи үөрэхтээһин салаатын салайааччыта Антонина Саввинова тахсан оҕолору эҕэрдэлээтэ уонна хас биирдиилэригэр анал сэртипикээттэри ытыс тыаһын ортотугар туттарда.