Бу күннэргэ “Айхал” этнокультурнай сынньанар кииҥҥэ Дойду үрдүнэн ис дьыала үлэһитин күнүгэр аналлаах үөрүүлээх бырааһынньыктааҕы кэнсиэр буолан ааста.
Бу тэрээһиҥҥэ Булуҥ улууһун, Тиксии бөһүөлэгин баһылыктара, ис дьыала салайааччылара уонна үлэһиттэрэ, ону таһынан уопсастыба бэрэстэбиитэллэрэ сырыттылар. Полиция үлэһиттэрин күнүнэн Булуҥ улууһун баһылыга Игорь Владиславович Кудряшов, Тиксии бөһүөлэгин баһылыга Вячеслав Валерьевич Усачев, Булуҥ улууһун депутаттарын Сэбиэтин бэрэссэдээтэлэ Леонид Михайлович Калимбет, оройуоннааҕы суут бэрэссэдээтэлэ Н.С. Мартынов, оройуон борокуруора Максим Валерьевич Днепровский, 14145 байыаннай чаас хамандыыра Р.В. Мосенцев уонна ФСБ салайааччыта Е.В. Тарасов эҕэрдэ тыл эттилэр.
Булуҥ оройуонун ис дьыала салайааччыта, полиция подполковника Павел Сергеевич Собянин полиция үлэһиттэригэр үчүгэй үлэлэрин иһин наҕыраада, грамота туттартаата. Кини полиция үлэһиттэрэ талбыт идэлэригэр бэриниилээхтэрин уонна кинилэр үрдүк сатабылларынан араас быһылааннар арыллалларын бэлиэтээн этэр. Салайааччы ис дьыала үлэһиттэригэр, бэтэрээннэргэ уонна кинилэр дьиэ кэргэттэригэр махтанарын биллэрдэ.
Үөрүүлээх чаас кэнниттэн бырааһынньыктааҕы кэнсиэр буолла. Манна Булуҥнааҕы полиция үлэһиттэрэ, оскуола оҕолоро уонна Тиксии бөһүөлэгин артыыстара кыттыыны ыллылар.