Тулаайахтарга анаммыт дьиэ үлэҕэ киирдэ

110

Сэтинньи 15 күнүгэр Дьааҥы улууһун олохтоохторугар өссө биир үөрүүлээх түгэн буолла. Бу күн тулаайах уонна көрүүтэ-истиитэ суох хаалбыт оҕолорго анаммыт 12 кыбартыыралаах дьиэ аанын тэлэччи аста.


Санатан эттэххэ, федеральнай бырагырааманан бу иккис дьиэ тутуллан үлэҕэ киирдэ. Былырыын баччаларга 18 кыбартыыралаах дьиэни полистиролбетонтан «Арктика» ХЭУо (сал.В.Чириков) дьэндэппитэ. Быйылгы да тутуу онтон хаалсыбат. Манна биирдии хостоохторо 33 кв.м. иэннээхтэр. Итинник тоҕус кыбартыыра баар. Үһэ иккилии хостоохтор, олор 43 кв.м. иэннээхтэр. Дьиэни Сергей Аммосов салайааччылах «Сеал» ХЭУо (чараас истиэнэлээх ыстаал конструкциялартан тутан) үлэҕэ киллэрдэ.

Үөрүүлээх күҥҥэ алгысчыт аал уоту айах тутан маанылаабытын кэннэ саҥа дьиэҕэ киирэр аалай лиэнтэни быһыы буолла. Бу долгутуулаах түгэҥҥэ СӨ бырабыыталыстыба бэрэссэдээтэлин бастакы солбуйааччы Алексей Колодезников, СӨ тутууга уонна архитектураҕа миниистирин солбуйааччы Геннадий Гермогенов, ОДьКХ уонна энергетикэ миниистирэ Гаврил Левин, улуус баһылыга Виктор Павлов кытыннылар. Кинилэр дохсун ытыс тыаһыгар доҕуһуоллатан саҥа дьиэ хаһаайыттарыгар күлүүстэри туттардылар.