Улуус олоҕо: Тыа сиригэр ыччат саамай көхтөөх дьон

306

Булгунньахтаах ыччатын түмсүүтүн салайааччытынан Татьяна Емельянова үлэлиир. Эдэрдэр нэһилиэккэ ыытыллар субуотунньуктарга, култуура тэрээһиннэригэр көхтөөхтүк кытталлар.


Тупсарыныы сылыгар дэриэбинэлэрин ыраастааһыҥҥа саамай бастыҥнарынан буолбуттар. Чугастааҕы нэһилиэктэргэ гастролларга сылдьаллар. “Үрдэл” ансаамбылы тэрийбиттэр.

Спорт саалатыгар ыччат өрүү дьарыктанар. Волейбол, теннис, футбол курдук көрүҥнэри кэрэхсииллэр. Эрчиллэр буолан, улууска ыытыллар спортивнай күрэхтэһиилэргэ ситиһиилээхтик кытталлар. Покровскайга ыытыллыбыт мэр бирииһигэр волейболга уолаттар бастаабыттар.

Мин Амма улууһуттан төрүттээхпин. Манна музыкальнай оскуолаҕа баян кылааһын преподавателинэн үлэлии сылдьабын. Учуутал быһыытынан үөрэтэр оҕолорум өрөспүүбүлүкэҕэ, улууска ыытыллар куонкурустарга ситиһиилэринэн киэн туттабын. “Баянотехника” диэн куруһуогу үлэлэтэбин. Эдэр ыччат түмсүүлээхпит. Атын улуустарга гастроллары тэрийбит киһи диэн баҕалаахпын. Улуус бары нэһилиэктэрин ыччаттара биир түмсүүнү тэринэрбит буоллар, ордук кыайыылаах, биир сомоҕо буолуо этибит. Дойдубун ахтабын, куруук баран сынньанан кэлэбин. Амма Хаҥалас улууһун ыччатын түмсүүтүн тэрийэр баҕалаахпын, – диэтэ олоххо көхтөөх ыччат Илья Иванов.


2017 сылга Ил Дархан Егор Борисов Ыччат сылынан биллэрбитин олохтоох ыччат олус сэргээбит. “Эдэр исписэлиистэри олохсутар туһуттан уопсай дьиэ тутуллара былааннанар. Маны сэргэ араас күрэхтэр, култуурунай тэрээһиннэр былааннаналлар. Социальнай хайысхаҕа син-биир үлэлэһиэхпит. Онон үүнэр сылтан элбэх таһаарыылаах үлэни бэйэбититтэн күүтэбит«, — диир түмсүү салайааччыта Татьяна Емельянова.

Сыыппара: Булгунньахтаахха 337 ыччат олорор, 66 эдэр ыал баар.