Уус-Ньара олохтоохторун син-биир олох-дьаһах коммунальнай хаһаайыстыба боппуруостара долгуталлар

146

Соторутааҕыта Өймөкөөн улууһугар Саха Өрөспүүбүлүкэтин ситэриилээх былааһын 2016 сыллааҕы үлэтин отчуота ыытылынна. Олохтоохтор, хаһан баҕарар буоларын курдук, ОДьКХ сайдыытын тула элбэх ыйытыыны биэрдилэр.


СӨ Тырааныспар уонна суол хаһаайыстыбатын миниистирэ Семен Винокуров салайааччылаах оробуочай бөлөх улуус дьаһалтатыгар нэһилиэнньэни кытта тус көрсүһүүттэн отчуоттуур үлэтин саҕалаата. Уус-Ньара олохтоохторун иннигэр ааспыт сыллааҕы үлэ-хамнас туһунан отчуоту култуура киинигэр оҥордо.

Өрөспүүбүлүкэҕэ 18-с төгүлүн ыытыллар ситэриилээх былаас үлэтин отчуоттуур мунньахха Семен Винокуров социальнай-экономическай сайдыы бары эйгэтин таарыйда, ол иһигэр Өймөкөөн улууһугар өрөспүүбүлүкэ таһымыгар сыл устата туох үлэ ыытыллыбытын сырдатта. Түмүгэр, өрөспүүбүлүкэ ситэриилээх уорганнарын былааһа улуустааҕы муниципалитеты кытта нэһилиэнньэ олоҕо туруктаах буолуутугар туһуламмыт үлэни салҕыы ыытарга өрүү бэлэмин туһунан тоһоҕолоон бэлиэтээтэ.

Улуус олохтоохторо доруобуйа харыстабылыгар, хаарбах туруктаах дьиэлэртэн көһөрүү бырагырааматыгар, улууска оптоволоконнай сибээс хаһан кэлэригэр, улуустааҕы Сбербаан салаатын үлэтигэр, сөмөлүөтүнэн көтөргө тарифтарга, урбааҥҥа, геология салаатын инники дьылҕатыгар, олорор дьиэ сертификаттарын ылыыга сыһыаннаах о.д.а. сытыы боппуруостары көтөхтүлэр.

Хаһан да буоларын курдук, ордук элбэх боппуруос олох-дьаһах коммунальнай хаһаайыстыбатын эйгэтигэр туһаайылынна. Отчуоттуур бөлөх салайааччыта уонна биэдэмэстибэлэр бэрэстэбиитэллэрэ ыйытыктарга барыларыгар тустаах хоруй биэрдилэр, сорохторго салайааччылары кытта тус көрсөн, кыһалҕаларын чопчулаан, туруорсууларын суругунан киллэрэллэригэр сүбэлээтилэр.

СӨ ситэриилээх былааһын үлэтин отчуоттуур бөлөҕө Үчүгэй, Томтор, Сордоҥноох, Өймөкөөн, Төрүт нэһилиэктэрин, Аартык бөһүөлэгин барытын хаптылар.

Томтор нэһилиэгин олохтоохторо быйылгы мунньахха улаханнык турунан туран кытыннылар. Кинилэр СӨ ситэриилээх уорганнарын сыллааҕы үлэтэ ситэтэ суоҕунан, мөлтөҕүнэн сыаналаатылар. Олохтоохтор туруорсубут кыһалҕаларыгар толору эппиэт ылбатыбыт диэн этиннилэр уонна кэнэҕэскитин отчуоттуур бөлөх сыл аайы биир састаабынан кэлэрэ ордугун ыйдылар.

Бырабыыталыстыба отчуотун түмүктүүр мунньах “Өймөкөөн улууһа (оройуона)” МТ дьаһалтатын аактабай саалатыгар ыытылынна.