«Арчы» дьиэтигэр бэрт сэргэх кэпсэтии буолан ааста.
Ол курдук, бу күн ХИФУ культурологияҕа кафедратын профессора, педагогическай наука кандидата Галина Семеновна Попова – Санаайа салайыытынан «Хомуһун» литературнай түмсүү кыттыылаахтара Дмитрий Местников, Айаал Молокотин, Надежда Монастырева Софронов А.И. – Алампа «Ытык хайалар кэпсэтиилэрэ» айымньытын уус – ураннык толорбуттарын мустубут дьон истэн баран, сэһэн ис хоһоонун хайдах өйдөөбүттэрин өрө көтөҕүллэн туран ырыттылар. Галина Семеновна быһаарарынан, Алампа бу айымньытынан олох үс суол кистэлэҥин арыйбыт диир. Бастакытынан, бу ытык хайаларга Аан дойду иччитэ алгыһын этэн хаалларбыт, иккиһинэн, Тыгын тымырдарын сыдьааннара дьылҕаларын тыыран хаалларбыттар, үсүһүнэн, Эллэй ыччаттара эҕэрдэлэрин этэн хаалларбыттар эбит.
Кэпсэтиигэ кыттыбыт дьон быһааралларынан иһиттэххэ, аныгы дьон олоҕун сиэринэн көрдөххө, бу сэһэҥҥэ билиҥҥи киһи майгыта – сигилитэ арылхайдык көстөр. Бу айымньы саха киһитин элбэххэ толкуйдатар эбит диэн толкуйга киирдим. Сэргэх кэпсэтиибит иккис аҥарыгар Галина Семеновна саха итэҕэлин сүрүн өйдөбүллэрин сырдатта. Лазарь Андреевич – Тэрис «Айыы үөрэҕин төрүтэ» диэн саҥа таһааттарбыт кинигэтин билиһиннэрдэ уонна Арчы дьиэлэрэ хайдах сыаллаах – соруктаах үлэлиэхтээхтэрин быһаарда.
Билигин саха итэҕэлин норуокка тарҕатар сыалтан, нэһилиэк баһылыктара Арчы дьиэлэрин бэйэлэрин кыахтарынан туттаран эрэллэрэ хайҕаллаах. Ол гынан баран, бу дьиэлэри сатаан салайан үлэлэтэргэ болҕомто ууруллуохтаах. Айыы дьиэлэригэр саха итэҕэлигэр олоҕуран, оҕо төрүөҕүттэн саҕалаан Айыы үөрэҕэр сыһыаннаах тэрээһиннэри тэрийэн, олохтоох дьону Айыы суолун батыһарга үөрэтэн, Айыы киһитэ буоларга иитии үлэ барыахтаах. Бу сэргэх тэрээһиҥҥэ кыттыбыт дьон бары да сүргэбит көтөҕүллэн тарҕастыбыт.