«Дуорай» дуорайа туруохтун

549

Бу хомус ансаамбылын Тамара Спиридонова салайбыта биэс сыл буолла. Кини хас биирдии оҕо талаана аһыллан, сөптөөх кэрдиискэ тахсарын туһугар кыһаллар. Оҕолор да салайааччыларын олус ытыктыыллар, киниттэн элбэҕи сүбэлэтэллэр.


«Дуорай» хомус ансаамбылын кыттыылаахтара улуус, өрөспүүбүлүкэ, ону таһынан тас дойдуларга араас күрэстэргэ элбэхтик кытталлар. Улууспутугар буолар кэнсиэртэр кинилэрэ суох ааспаттар.

salajaachchy-tamara-spiridonovaТамара Николаевналыын оҕолору хайдах сүүмэрдиирин, дьарыктарын туһунан кэпсэттибит. «Төрөппүт оҕотун олох кыра сааһыттан дьарыкка биэрэ сатыыр. Ол өйдөнөр. Ким оҕото дьарыктаах, талаана аһыллан инникитин олоҕор туһалаах буолуон баҕарбат буолуой? Ол эрээри, мин манна биири тоһоҕолоон этиэхпин баҕарабын. Оҕо чахчы бу хомус диэн тугун билэр, өйдүүр, хомус тарда үөрэниэн баҕалаах буоллаҕына күнтэн күн салгыбакка дьарыктыахха наада. Оччотугар кини чахчы дьаныардаахтык эрчиллэн, инникитин ситиһиилэрдээх буолуо. Сорох оҕолор кэлэн баран хомуһу биирдэ, иккитэ тардан көрөн баран сылайан, аралдьыйан хаалааччылар. Ол эрээри, ансаамбылбар өр сыл сылдьар оҕолорум олус тулуурдаахтык, адьас сөбүлээн, сэргээн туран эрчиллэллэр. Аны оҕону олох кыратыгар хомуска дьарыктыыр эмиэ табыгаһа суох. Тоҕо диэтэххэ, тииһэ бөҕөргүү илик. Онон хомус тардарыгар тииһэ миилэтиттэн хамсыан сөп дии саныыбын. Оҕону бастакы кылааска киирээтин кытта аҕалар төрөппүттэр эмиэ баар буолааччылар. Дьиҥэр, оҕо оскуолаҕа киирбит сылыгар адаптацияланар. Онон бастакы кылааска киирбиттэри арыый тохтото түһүөххэ сөп. Уопсайынан, мин оҕолору олох кыра саастарыттан уонна төрөппүт эрэ баҕатынан буолбакка, чахчы дьарыктаныа диэтэхпинэ ылабын. Маны сэргэ элбэх оҕону биирдэ дьарыктаабаппын. Ахсааныгар буолбакка, хаачыстыбатыгар үлэлиир буоллахпына ситиһии баар буолар диэн бэйэм олохпор халбаҥнаабакка кытаанахтык тутуһар девизтээхпин», – диэн кылгастык бэйэтин тус санаатын үллэһиннэ.

«Дуорай» хомус ансаамбылыгар 7 оҕо сылдьар, маны таһынан быйылгы сылга 30 оҕо уһуйаан бастакы кылааһыгар киирдэ. Ансаамбылга уһуннук Федоров Андрей, Ильина Света дьарыктаннылар. Кинилэр араас куонкурустарга ситиһиилэрин киһи мыыммат. Урукку өттүгэр дьарыктаммыт Николаева Диана Күндэйэҕэ үөрэнэ сылдьар. Диана онно бэйэтэ оҕолору дьарыктыырын салайааччыта Тамара Николаевна үөрэ-астына кэпсиир.

«Дуорайдар» ситиһиилэрэ:

2012 сыллаахха «Зажги свою звезду» диэн норуоттар икки ардыларынааҕы куонкуруска II степеннээх лауреат буолбуттара. Эмиэ бу сыл «Хотугу сулус» куонкуруска бастыҥ хомус ансаамбылын аатын ылбыттара, оттон салайааччылара Тамара Спиридонова бастыҥ салайааччынан буолбута. 2013 сыллаахха ансаамбыл Москуба уонна Санкт-Петербург куораттарга ыытыллыбыт ыһыахтарга кыттан, дьон биһирэбилин ылбыта. 2015 сыллаахха «дуорайдар» солистара Федоров Андрей «Хомус кырдала» норуоттар икки ардыларынааҕы куонкуруска II степеннээх лауреат, 2016 сыллаахха «Бриллиантовай нуоталар» норуоттар икки ардыларынааҕы куонкуруска ансаамбыл I степеннээх лауреат, Андрей Гран-При хаһаайына буолбуттара.

Аан дойду таһымнаах күрэстэргэ биэс сыл иһигэр сэттэтэ кыттан, үрдүк ситиһиилэри ыллылар. Андрей, Света өрөспүүбүлүкэҕэ «Лучший варган» аат хаһаайыннара. Тамара Спиридонова үс төгүл бастыҥ салайааччы аатын ылбыта элбэҕи этэр. «Дуорай» өрөспүүбүлүкэҕэ биир бастыҥ ансаамбыл быһыытынан биллэр. Маныаха ансаамбылы кытта ыкса сибээстээхтик биир дойдулаахпыт, энтузиаст хомусчут, сыыйа тардыы истиили үөрэтээччи, тарҕатааччы Никитина Антонина Константиновна үлэлэһэрин киэн тутта этэбит. Киниэхэ ансаамбыл салайааччыта, оҕолор махталлара улахан.

Бу сайын хомусчут оҕолор Анапа куоракка «Эдэр талааннар» бэстибээлгэ кыайыы-хотуу өрөгөйүн билэн кэлбиттэрэ. Бэстибээли тэрийээччилэр, кыттыылаахтар, көрөөччүлэр оҕолору ытыстарын үрдүгэр түһэрэн илдьэ сылдьыбыттар, сөҕүү-махтайыы бөҕө буолбуттар. Өссө куонкурус балаһыанньатынан иккис түһүмэххэ икки ансаамбыл холбоһон биир нүөмэри көрдөрөр буолбуттарыгар, биһиги «дуорайдарбытын» кытта сценаҕа тахсыан баҕалаах элбээбит. Сахалыы таҥастарын олус сэргээбиттэр, хаартыскаҕа түһүспүттэр. Бэстибээл түмүгүнэн (барыта 200 кыттааччы баар эбит) ансаамбыл II степеннээх лауреат буолбута, Арассыыйаҕа 3 бастыҥ ансаамбыл иһигэр киирбиттэрэ. Федоров Андрей көрөөччүлэр биһирэбиллэрин ылбыта.

«Дуорайдар» соторутааҕыта биэс сыллаах үбүлүөйдэрин бэлиэтээтилэр. Онуоха сыл иһигэр элбэх ситиһиилээхтэри чиэстиир бэрт үтүө үгэстээх Оҕо дьоҕурун сайыннарар киин кинилэргэ анаан олус сэргэх тэрээһини ыыппыта дьону-сэргэни улаханнык үөртэ. Түгэнинэн туһанан, бары оҕолорбут ситиһиилэрэ үксүү турдун, саҥа сыл үтүөнү түстээтин диэн баҕа санаабыт бастыҥын тиэрдэбит.