Үөһээ Бүлүүгэ маассабай спорду сайыннарыыга саҥа соруктар туруорулуннулар

303

Үөһээ Бүлүү улууһун спорт управлениетын начальнигынан Николай Николаев ананан үлэтин саҕалаата. Тэрилтэ Хоро спортивнай саалатын, оҕо спортивнай оскуолатын, элбэх функциялаах спортивнай сааланы, ичигэс манеһы кытта барыта холбоон 47 үлэһиттээх. 


Үөһээ Бүлүүтээҕи элбэх функцияны толорор спортивнай саала уонна сүүрэргэ анаммыт ичигэс манеж биир да күн өрөбүлэ суох үлэлиир. Саҥа талыллыбыт салайааччы Николай Николаев маны олох ирдэбилин быһыытынан сыаналыыр.

— Сарсыарда 6 чаастан киэһэ 10 чааска диэри уопсайа 68 киһи кэлэн спорт араас көрүҥнэригэр дьарыктанар, ол иһигэр 18 киһи спордунан утумнаахтык, сорохторо күнүнэн кэлэн дьарыктаналлар. Бу оҕолору аахпакка туран. Онон, биһиги улууспут дьоно-сэргэтэ спорду сэҥээрэллэр, таптыыллар эбит диэн түмүккэ кэлиэххэ сөп. Маныаха хас биирдии спорт көрүҥэр туһааннаах тренэрдэр эрчийэллэр, саҥа саҕалыыр киһиэхэ сүбэлээн-амалаан, көрдөрөн, кинилэр эчэйиини ылбаттарын туһугар кыһаллаллар. Элбэх функциялаах спортивнай саалаҕа икки спортивнай уонна тренажернай саалалар үлэлэрин саҕалаатылар. Ол курдук, чэпчэки атлетика, волейбол, баскетбол, мини футбол, «ММА» диэн бокса уонна тустуу аҥаардаах спорт аныгы көрүҥэ, гиирэ, сүүрүү, мас тардыһыыта, хотугу многоборье дьарыктара ыытылла тураллар. Итиэннэ элбэх функциялаах саалаҕа 27 араас тренажер туруорулунна, быччыҥ хачайданартан сүүрэр дорожкаҕа тиийэ. Маны сэргэ, адаптивнай спорду сайыннарыыга доруобуйаларынан хааччахтаах дьоҥҥо эмиэ 3 тренажер кэллэ, кэлээскэҕэ олорор ыарыһах эмиэ этин-сиинин чөлүгэр түһэрэригэр аналлаах муннук баар.

— Николай Николаевич, үлэҕит саҕаламмытынан эҕэрдэлиибин. Үлэлииргэ, дьэ, кырдьык, кыах да, баҕа да баар диэн көрдүм.

— Сөпкө бэлиэтээтиҥ, дуоһунаска саҥа анаммыт дьоннор көрүүбүт даҕаны, былааммыт да элбэх. Үгүс кэпсэтии түмүгэр саҥа спортсаалаҕа дьарыктаныы төлөбүрдээх буоллун диэн биир санааҕа кэллибит. Онуоха олохтоохтор этиилэрин эмиэ учуоттаатыбыт. ФЛГ түмүктээх уонна дерматолог быраастан сыстыганнаах ыарыыта суох диэн анал ыспыраапкалаах буоллаххытына, ыйга биир тыһыынча солкуобайы төлөөн баран, күн аайы кэлэн спорт ханнык баҕар көрүҥүнэн дьарыктаныаххытын сөп. Онтон бириэмэтэ тиийбэт киһи күҥҥэ биир мөһөөҕү төлөөн баран, талбыт күнүгэр кэлэн дьарыктанар кыахтанна. Онтон оҕолорго сыана аҥаарынан быһылынна. Төлөбүрэ барыта отчуоттанан, бухгалтерия нөҥүө ааһар. Абонеменнаах киһи дьарык кэннэ суунар, ыйга биирдэ сауна өҥөтүнэн туһанар бырааптаах.

— Скандинавскай хаамыыны биһиги улуус дьоно өрө туталларын бэйэҕит бэркэ билэн олороҕут. Кинилэргэ туох эмэ усулуобуйа баар буолуо дуо?

— Чахчыта, үөһээ бүлүүлэр скандинавскай хаамыынан дьыл ханнык баҕар кэмигэр сөбүлээн дьарыктаналлар. Ордук саастаах дьон сарсыарда 5-6 чаастан хаамалларын билэбин. Онон кинилэргэ анаан «Үс Хоһуун» стадион сүүрэр дорожкатын кытыытынан суол астарар былааннаахпыт.

Ичигэс манеж дириэктэринэн эдэрдии эрчимнээх Игнат Сельгесов ананна. Кини спорт эйгэтигэр уопуттаах үлэһит буоларын быһыытынан, инникитин манеж күүскэ үлэлиирин ситиһэр сыаллааҕын этэр:

— Улууспутугар ичигэс манежтаахпытыттан киэн туттабыт. Урут баҕалаах киһиэхэ чахчы усулуобуйа да суох курдук этэ. Мин бэйэм сүүрүүнэн күүскэ дьарыктаммыт буоламмын, маннык манеж киһиэхэ бары өттүнэн туһалааҕын бэлиэтиибин. Манна сарсыарда алтаттан ыччаттар, аҕам да саастаах дьон кэлэн сэрээккэлии, хаама, сүүрэ сылдьалларын көрөр олус үчүгэй. Итиэннэ оҕолорго уонна улахан дьоҥҥо манеж иһигэр саахымаччыттарга икки хос бэрилиннэ. Онон сайдарга, дьон сөбүлүүр спортарын көрүҥүнэн дьарыктаналларыгар усулуобуйа олохтонно.

Онон биһиги улууска спорт күүскэ сайдыахтаах.

Салалта быһаарыы ылбытынан хас киэһэ аайы 6 чаастан 9 чааска диэри Буучугурас, Бычырдаан, Мордьоноохоп ааттарын сүгэр «Үс Хоһуун» стадион территориятыгар бар дьону спортка ыҥырар сыалтан музыка ньиргиччи тыаһыаҕа, итиэннэ өрүү уотунан сандаара тыгыаҕа.