СӨ тас сибээстэһиилэргэ миниистиринэн үлэлээбит, сахалартан бастакынан тас дойдуга Монголияҕа РФ генеральнай консулунан үлэлээбит Александр Васильевич Мигалкин тыыннааҕа буоллар быйыл 60 сааһын туолуо этэ.
Саха норуота Александр Мигалкины сүтэрбитэ алта сыл буолла… Бу кэм устата олох уларыйда, Саха сирэ үөрэхтээһин, култуура, спорт, өй-санаа бары хайысхаларыгар сайдыы саҥа таһымыгар таҕыста. Александр Мигалкин билигин биһиги кэккэбитигэр төһө да суоҕун иһин, Саха сирин бүгүҥҥү кыайыыларыгар, ситиһиилэригэр киллэрсибит кылаата үгүс. «Кини тас дойдулары кытта сыһыаҥҥа үгүс кэскиллээх үлэни ыыппыта, саҥа сүүрээннэри киллэрбитэ. Онуоха сөптөөх кадрдары иитэн таһаарбыта. Ол барыта түмүллэн, силистэнэн, ситэн-хотон, саҥаттан саҥа таһымҥа тирэҕирэн тахсан иһэбит. Оннук инникини өтө көрөн үлэлиир, киэҥ өйдөөх-санаалаах киһи этэ Александр Васильевич. Кини кылгас уонна чаҕылхай олоҕу олорбута. Александр Мигалкины букатыннаахтык сүтэрии ыар аһыытын кэм-кэрдии хаамыыта уҕарыппата… оннук үтүө киһи этэ, биһиги коллегабыт, доҕорбут, сүбэһиппит», — диэн бииргэ үлэлээбит коллегалара, чугас доҕотторо, табаарыстара ахталлар.
Дипломат, сахалартан бастакы генеральнай консул, омук тылын хас да өрүтүн баһылаабыт, кылгас эрээри чаҕылхай олоҕу олорон ааспыт үтүө киһи 1975 сыллаахха Мүрү 1 №-дээх орто оскуолатын үөрэнэн бүтэрбитэ. Быйыл бу оскуола төрүттэммитэ 145 сылын бэлиэтиир. Александр Васильевич Мигалкин курдук чаҕылхай выпускниктарын бүгүҥҥү 661 оҕолоох оскуола коллектива умнубат. Быйыл кини төрөөбүтэ 60 сылыгар анаан бастакы улуустааҕы «Эдэр дипломат» куонкуруһу тэрийэн ыытта.
Александр Васильевич диэн кимий, кини үлэһит, дьиэ кэргэн аҕатын, убай, быраат, көннөрү киһи, табаарыс быһыытынан хайдах этэй? Бу туһунан бүгүҥҥү көлүөнэ ыччакка үтүө өйдөбүлү Александр Васильевич уола, СӨ үөрэххэ уонна наукаҕа миниистирин солбуйааччыта Василий ийэтинээн Надежда Иннокентьевналыын, Россия МИД-ын Дьокуускай куоракка бэрэстэбиитэлэ Николай Дьяконов, СӨ тас сибээстэһиилэргэ Департаменын салайааччытын бастакы солбуйааччыта Диана Степанова, СӨ тас сибээстэһиилэргэ Департаменын Американы уонна Европаны кытта үлэлиир отдел салайааччыта Айталина Никифорова, Александр Васильевич бииргэ улааппыт, үөрэммит табаарыһа медицинскэй наука доктора, Дьокуускайдааҕы оҕо балыыһатын кылаабынай бырааһа Маргарита Самсонова, бииргэ төрөөбүттэрэ Афанасий, Иван, Зоя, Мария Мигалкиннар, экономическай наука кандидата Владимир Черноградскай иҥэрдилэр. Онтон СӨ Владивостокка, Благовещенскайга, Кытайга Пекин куоракка бастайааннай бэрэстэбиитэл солбуйааччылара, Александр Васильевич иитэн-үөрэтэн таһаарбыт коллегалара Ким Борисов, Геннадий Жирков, Степан Андреев быһа сибээскэ тахсан, куонкурус кыттыылаахтарыгар эҕэрдэлэрин тиэртилэр.
Уус Алдан улууһун баһылыга Алексей Федотов быйыл АВ. Мигалкин төрөөбүтэ 60 сылын бэлиэтиир тэрээһиннэр былаан быһыытынан баралларын иһитиннэрдэ.
Дипломат, сахалартан бастакы генеральнай консул 60 сааһыгар анаммыт «Эдэр дипломат» куонкуруска Мүрү 1 №-дээх, Мүрүтээҕи уолаттар гимназияларыттан, Дүпсүн, Лөгөй оскуолаларыттан барыта 16 оҕо кыттыыны ылла. Кинилэр быһа сибээскэ түөрт түһүмэххэ кыахтарын холоннулар: бэйэлэрин бырайыактарын көмүскээтилэр; дьылабыай тиэкиһи английскайтан нууччалыы тылбаастаатылар; Аан дойду, Россия политикатын таарыйар тиэмэлэргэ тута бэйэлэрин санааларын этэн, тыл-өс өттүгэр сатабылларын көрдөрдүлэр; төрөөбүт дойду историятыгар билиилэрин тургуттулар.
Бастакы «Эдэр дипломат» куонкурус муҥутуур кыайыылаахтарынан Дүпсүн орто оскуолатын 10 кылааһын үөрэнээччитэ Дима Румянцев, Мүрү 1 №-дээх оскуолатын 9 кылааһын үөрэнээччитэ Дьулус Павлов уонна Мүрүтээҕи уолаттар гимназияларын 8 кылааһын үөрэнээччитэ Айсен Бочкарев буоллулар. Маны таһынан Дьулус Павлов Россия МИД-ын Дьокуускай куоракка бэрэстэбиитэлэ Николай Дьяконов тус бэйэтэ анаабыт бирииһин тутта.
Куонкурус тэрээһинигэр «Кэнчээр» оҕо образцовай ансаамбыла Россия, Саха сирин, Уус Алдан гиимин, Александр Васильевич саамай таптаан ыллыыр «Доҕорум дабай күөх сыырдаргын» ырыатын «Мүрү эрэллэрэ» ансаамбыл толордулар.
— Александр Васильевич сырдык кэриэһигэр анаммыт «Эдэр дипломат» куонкуруһу тус бэйэм хонтуруолбар ылыам. Салгыы эһиги, дипломат, сахалартан бастакы генеральнай консул төрөөбүт дойдутун, үөрэммит оскуолатын ыччаттара, республика таһымыгар ыытыллар куонкуруска кыттаргыт наада, — диэн Россия МИД-ын Дьокуускай куоракка бэрэстэбиитэлэ Николай Дьяконов бу куонкурус кэскиллээҕин туһунан бэлиэтээн эттэ.