Метка: Аан дойду дьахталларын күнэ

Найахы эр дьоно нэһилиэк кэрэ аҥардарын ырыанан эҕэрдэлээтилэр

Аан дойду дьахталларын күнүгэр аналлаах Найахытааҕы сынньалаҥ киин дьиэтигэр «Ис сүрэхтэн…» диэн нэһилиэк эр дьонун эҕэрдэ кэнсиэрэ ыытылынна. Эр дьон бары тахсан «Ийэҕэ махтал» ырыаны толордулар, хас биирдии кэрэ аҥарга тыыннаах сибэкки туттардылар. 

Саала иһэ тобус-толору мустубут. Эрдэттэн кэнсиэркэ бэлэмнэнии күүскэ ыытылларын истэн, Кэптэниттэн тиийэ далбар хотуттар кэлэн, мааны ыалдьыт буоллулар.

Кэнсиэргэ нэһилиэк баһылыгыттан саҕалаан эдэр ыччатыгар тиийэ кыттыыны ыллылар. Ол курдук олохтоох дьаһалта (баһылык Сивцев П.С.), сынньалаҥ киин (директор Гаврильев Дь.В.), оскуола (директор Колодезников Я.И.), детсад (завхоз Рожин Н.Н.), «Найахы» ТХПК (Румянцев И.П.), баһаарынай чаас (Федоров В.Э.), дьиэ-уот коммунальнай хаһаайыстыбата (Лугинов Р.П.) эр дьонун коллективтара, сыана ветераннара, эдэр ыччаттар бары сыанаҕа тоҕо анньан таҕыстылар.

Кэнсиэр саҕаланыаҕыттан бүтүөр диэри ытыс тыаһынан ньиргийэн олордо. Видеосюжет киэргэтиилээх ураты концеры көрөн олорор кэрэ аҥардар истиҥ мичээрдэрэ кыттааччыларбытыгар өссө күүс-көмө буолла. Бу кэрэ киэһэҕэ хас биирдии ырыа, сценка, хоһоон ааҕыыта ис сүрэхтэн толоруллан истиҥ бэлэх буолла.

Нэһилиэк бары эр дьоно түмсүүлээхтэрин көрдөрдүлэр.

Күндү Саха сирин дьахталлара!

Эһигини Саха Өрөспүүбүлүкэтин Ил Түмэнэ Дьахталлар аан дойдутааҕы күннэринэн эҕэрдэлиибит!

Уһун тымныылаах кыһыммыт кэнниттэн сандал саас кэлиитин, ийэ айылҕабыт уһуктуутун кэрэһэлиир бырааһынньыкка кэрэ аҥардар тустарыгар истиҥ иэйиилээх тыллары аныыбыт. Дьахтар бу орто туруу дойдуга олоҕу бэлэхтиир, алаһа дьиэни араҥаччылыыр, эр киһиэхэ өйөбүл, тирэх буолар үрдүк аналлаах. Амарах санаатынан, аһыныгас дууһатынан, ийэлии кыһамньытынан норуотун кэскилин түстүүр.

Аныгы кэмҥэ Саха сирин дьахталлара бары эйгэҕэ ситиһиилэнэн, уопсастыбаннай уонна политическай олоххо көхтөөхтүк кыттан, саҥа идэлэри баһылаан үтүө холобур буолаллар. Дойдубут, өрөспүүбүлүкэбит социальнай-экономическай, духуобунай сайдыытын боппуруостарын, кыһалҕаларын быһаарыыга өрүү инникки күөҥҥэ сылдьаллар.

Саха Өрөспүүбүлүкэтин Ил Түмэнэ дьиэ кэргэни, ийэ буолууну уонна оҕо аймаҕы сокуон өттүнэн өйүүргэ сүрүн болҕомтотун уурар, демография политикатыгар тустаах дьаһаллары ылынар. Биллиилээх судаарыстыбаннай деятеллэр Софья Сидорова, Мария Нартахова, Александра Овчинникова, Евдокия Горохова уо.д.а. судаарыстыбаннаһы бөҕөргөтүүгэ ылбыт кирбиилэрин ыһыктыбакка, бэһис ыҥырыылаах Ил Түмэҥҥэ үлэлии сылдьар депутат-дьахталлар салгыы сайыннараллар.

Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын депутаттарын I cъеһигэр улуустартан, нэһилиэктэртэн депутат-дьахталлар түмсүөхтэрэ. Съезд кэмигэр Саха сирин парламентарий-дьахталларын уопсастыбаннай-политическай кулууба үлэлиэҕэ.

Күндү Саха сирин дьахталлара! Эһиэхэ үлэҕитигэр, бары саҕалааһыҥҥытыгар ситиһиилэри, дьолу, дьиэ кэргэҥҥитигэр этэҥҥэ буолууну, сааскылыы чэбдик, чөл туругу баҕарабыт!