Тупсаран оҥоруу сыла — Архив новостей

Быйыл Амма улууһугар тупсаран оҥоруу Сыла биллэриллэн уонна эһиил буолуохтаах Оонньуулары көрсө ырааһырдыы үлэтэ көхтөөхтүк барар. Ыытыллар үлэҕэ улуус дьаһалтатын үлэһиттэрэ бэйэлэринэн холобур буолаллар.

Улуус баһылыгын социальнай боппуруостарга солбуйааччы Прасковья Ивановна Емельянова «Төрөөбүт дойдуга таптал» диэн ыҥырыы таһааран, Амма нэһилиэгин иһигэр хас эмэ сылы быһа ыһыллан сыппыт хаарбах тимирдэри уонна мастары ыраастааһыны саҕалаата.

Киниэхэ социальнай эйгэ тэрилтэлэрин салайааччылара көмөлөстүлэр. Ол курдук, бурдукка үлэлээбит урукку техникалар, хаар-ардах аннынан дьэбинирэн турбут эргэ массыына анал миэстэҕэ илдьилиннилэр.

Прасковья Ивановна бэйэтин эстафетатын салгыы баһылыгы тутууга солбуйааччы Дмитрий Дмитриевич Ивановка биэрдэ. Салайааччы ону ылынан эмиэ хаарбах тимирдэри ыраастаата. Кини эстафетаны Амма түмсүүтүн салайааччытыгар Александр Дмитриевич Неустроевка туттарда.

Алтан нэһилиэгэр олус кэрэ көстүүлээх, оҕо дуоһуйа оонньуур былаһаакката баар буолла. Чуопчаарар оҕо-аймах иллэҥ кэмин атаарар бэртээхэй сирдэммитин арыйар үөрүүлээх күнэ буолан ааста.

«Үүнэр көлүөнэ» фонда Амма улууһун уонна нэһилиэк дьаһалтатын туруорсууларынан бэртээхэй диэн оҕо былаһааккатын аҕалан туруоран, таҥан биэрдэ. Үөрүүлээх аһыллыыга улуус баһылыга Н.А. Архипов: «Нэһилиэк куратора, баһылыгы тутууга солбуйааччы Д.Д. Иванов уонна нэһилиэк баһылыга М.М. Неустроев сүүрэн-көтөн үлэлээбиттэрин түмүгэр, маннык үчүгэй оҕо оонньуур былаһаакка баар буолла. Фондаҕа махталбыт улахан. Инникитин да салгыы маннык үлэлэр барыахтара«, — диэн эттэ.

Былаһааккаҕа дьэрэкээн өҥнөөх хачыаллар, сырылыыр сыырдар, араас эргийэр тэриллэр уо.д.а. бааллар. Кинилэр бары оҕо эчэйбэтигэр аналлаах матырыйаалтан оҥоһуулаахтар.

Алтан орто оскуолатын 4-с кылааһын үөрэнээччилэрэ Сардана Сутакова уонна Ира Сивцева үөһээ диэки күөрэйэр хачыалы ордороннор, күннэтэ кэлэн оонньууллар эбит.

— Кэлэн астына оонньуур сир баар буолбутуттан наһаа үөрэбит. Оҕо бөҕө сылдьар. Бу хачыалы уонна сырылыыр дьиэни астынныбыт. Бары харыстаан оонньуохпут, — диэн кыргыттар санааларын үллэһиннилэр.

Кинилэр үөрүүнэн туолбут харахтара барытын кэпсииллэр. Тыа сиригэр маннык тутуулар баар буолуулара кэлэр кэнчээри ыччаппыт кэрэҕэ, сырдыкка тардыһарыгар, дьоллоох оҕо сааһын дьикти кэрэ сиргэ атаарарыгар төһүү буолара саарбаҕа суох.

Республикабытыгар баар «Үүнэр көлүөнэ» фонда бу курдук улуустарынан былаһааккалары үбүлээн тутан биэрэрэ үтүө үгэс буолла.