тустуу — Архив новостей

Табалаах ыччата Айсен тустууга өссө биир ситиһиилэннэ

Табалаах нэһилиэгиттэн төрүттээх Айсен Потапов Красноярскайга буолан ааспыт Д.Г. Миндиашвили аатынан тустуу Академиятын бирииһигэр Бүтүн Арассыыйатааҕы турнирга 61 кг ыйааһыннаахтарга боруонса мэтээли ылла.

Айсен Потапов турнир бастакы күнүгэр тустубут 61, 65, 92, 97 киилэлээх бөҕөстөртөн, Саха сиригэр мэтээл аҕалбыт соҕотох бөҕөс буолла. Төһө да Иван Ярыгин кэриэһигэр ыытыллар Аан дойдутааҕы Голден-при турнирга путевка ылбатар, кэскиллээх тустуук буоларын көрдөрдө диэн тустуу исписэлиистэрэ сыаналыыллар.

19 саастаах Айсен бастакы тустуутугар Кемероваттан сылдьар Андрей Гришаковы ыраастык, салгыы Казахстан бөҕөһө Абиль Усины 9:0 ахсаанынан кыайталаабыт. Үһүс хапсыһыытыгар РФ чөмпүйэнээтин призерэ, норуоттар икки ардыларынааҕы турнирдар кыайыылаахтара уонна призердэрэ Рустам Абдурашидовка 0:10 ахсаанынан хотторбут. Кини дьолугар Абдурашидов финалга тиийбит буолан, «утешиловкаҕа» түбэһэн, боруонса мэтээл иһин тустар чиэскэ тиксибит.

Төрдүс хапсыһыытыгар Айсен Арассыыйа ааспыт сыллааҕы юниордарга чөмпүйэнээтин боруонса призерэ Мурадбек Абдулкаримовы 14:3 ахсаанынан кыайар уонна боруонса мэтээл иһин киирсиигэ Бурятия улахан дьоҥҥо чөмпүйүөнэ Жаргал Доржиевы 11:7 ахсаанынан кыайар.

Айсен улахан дьоҥҥо Арассыыйа түһүлгэтигэр тустан, аан бастаан миэстэлэстэ. Кини билигин норуоттар икки ардыларынааҕы кылаастаах маастар Артур Константинов салалтатынан, Р.М. Дмитриев аатынан Олимпийскай эрэллэр училищеларыгар дьарыктанар. Тириэнньэрэ Айсены: «Уолбут улахан маладьыас, күүстээх характерын көрдөрөн, икки быһаарыылаах хапсыһыыга кыайыыны ситистэ. Кини мин эрчиллиилэргэ үөрэппит сымсатык атахха киирии албастарын оҥордо. Айсен дьоҕурдаах үөрэнээччи, барытын тутатына ылынан иһэр», — диэн тоһоҕолоон бэлиэтээбит. Артур Константинов өссө биир үөрэнээччитэ Семен Владимиров бу турнир кыайыылааҕа буолан, Ярыгин турнирыгар тустар быраабы ылбыт.

Дьааҥы улууһун эдэр бөҕөстөрүн меценат Чириков харчынан бириэмийэлээтэ

Өрөбүл күннэргэ Верхоянскайга урбаанньыт, меценат Владимир Чириков 60 сааһын туоларыгар анаммыт көҥүл тустууга куорат аһаҕас чөмпүйэнээтэ буолан ааста. Күрэхтэһиигэ аҕыс хамаандаттан 96 оҕо кэлэн, сааһынан үс бөлөххө хайдан, 14 ыйааһыҥҥа арахсан туһуннулар.

Икки күн устата барбыт турнирга 2007-2009 сыллардаах төрүөх уолаттарга 24 кг Верхоянскайтан бырааттыы Владик (III кылаас) уонна Айыллаан Игнатьевтар (I кыл.) пьедестал бастакы уонна үһүс үктэллэригэр таҕыстылар, кинилэр икки ардыларыгар Чөрүмчэттэн Антон Слепцов турда. Манна эбэн эттэххэ, тустуу күрэхтэригэр бастакытын кыттар Чөрүмчэ хамаандата (тириэнньэр Иннокентий Стручков) тоҕус призерданан, улахан ситиһиилэннэ. 26 кг Арыылаахтан Владик Слепцов бастаата, иккис миэстэҕэ Баатаҕайтан Саша Горохов, үһүскэ Адыаччыттан Витя Васильев таҕыстылар.

Боруулаахтар быйыл тустууга тириэнньэрдэрэ суоҕа билиннэ, оҕолор бэйэлэрэ хайдах сатыылларынан туһуннулар. Боруулаах хамаандатын биир дойдулаахтара Илья Попов аҕалан туһуннарда. Бу нэһилиэк оҕото Гена Стручков 28 кг бастаата уонна хамаандатыгар соҕотох мэтээли аҕалла. Иккис миэстэни Арыылаахтан Афоня Слепцов (тириэнньэр И. Седалищев), үсүһү Баатаҕайтан Афоня Аммосов (тириэнньэрдэр Виктор Ощепков, Василий Стручков) ыллылар. 30 кг Боронук оҕото Алеша Стадник (тириэнньэр Виктор Юмшанов) соҕотох буолан, бастакы миэстэни тустубакка да сурунна. 30 кг куорат тустууга Саша Семенов бастаата, иккис, үһүс миэстэни Боронук оҕолоро Слава Другин уонна Эрэл Андреев ыллылар.

2004-2006 сыллаах төрүөх уолаттар тустубут бастакы ыйааһыннарынан 32 кг буолла. Манна бастакы миэстэни Адыаччыттан Айтал Ксенофонтов (тириэнньэр Тимофей Болтунов), иккиһи куораттан Саша Анисимов, үсүһү Чөрүмчэ эрэлэ Владик Тихонов ыллылар. 35 кг пьедестал үктэллэригэр Аркадий Аммосов (Верхоянскай), Айтал Васильев, Ваня Донцов (иккиэн Баатаҕай) таҕыстылар. 38 кг сэттэ оҕо тустубутуттан, Амиль Лебедев (Адыаччы) бастаата, Слава Бочкарев (Верхоянскай) иккистээтэ, үһүс Давид Чириков буолла. 42 кг Чөрүмчэттэн Артур Крыжановскай ыйааһыныгар соҕотох буолан, бастакы миэстэни босхо сурунан кэбистэ. 46 кг сэттэ оҕо тустубутуттан, куораттар эрэллэрэ Сандал Старостин бастаата, иккис миэстэҕэ Элгэстэн Альберт Окладников (тириэнньэр Егор Находкин), үһүскэ Тулуйхан Горохов (Баатаҕай) таҕыстылар.

Улахан уолаттар (2000-2004 с.с.) 50 кг тустууларыгар саамай элбэх – 11 кыттааччы -баар. Бу ыйааһыҥҥа Элгэс ахсыс кылааһын үөрэнээччитэ Артур Слепцов тэҥнээхтэрин булбата, кини кэнниттэн Баатаҕайтан Миша Ошканов, Чөрүмчэттэн Слава Ефимов иккис, үһүс миэстэни ылары ситистилэр. Өссө биир элгэстэр эрэллэрэ Егор Рожин 54 кг бастакы миэстэни ылары ситистэ, иккиһи Верхоянскайтан Максим Аммосов, үсүһү Кеша Находкин (Элгэс) ыллылар. 58 кг дылы Верхоянскай 10-с кылааһын үөрэнээччитэ Саян Стручков бастаата, иккис миэстэни Коля Новгородов (Баатаҕай), үсүһү Афоня Слепцов (Адыаччы) ыллылар.

Саамай ыарахан 58 кг үөһэ ыйааһыннаахтарга баатаҕайдар күннээтилэр. Ол курдук улахан көбүөрдэргэ балачча тахсыылаахтык тустар Павел Стручков бастакы буоларын дакаастаата, кини кэнниттэн эһэ курдук күүстээх нуучча уола Виктор Петров иккис буолла, пьедестал үһүс үктэлигэр Владимир Соловьев (Боронук) таҕыста.

Чөмпүйүөннэр ортолоругар тустууга норуоттар икки ардыларынааҕы кылаастаах маастар Владимир Христофорович 10 тыһ. солк. бирииһин сэрэбиэйгэ тартарда. Онно 50 кг кыайыылааҕынан тахсыбыт Артур Слепцов саамай бааттаах буолан таҕыста.

Көҥүл тустуу кэнниттэн хапсаҕайга муҥутуур кыайыылааҕы быһаарарга оҕолору сааһынан үс бөлөххө арааран туһуннардылар. Манна бириистэри өрөспүүбүлүкэбит түһүлгэлэрин чөмпүйүөннэрэ Юрий Старостин, Роберт Сидоров, Василий Стручков 5 тыһ. солк. харчынан уонна хапсаҕай федерацията (салайааччы Гаврил Томскай) дойду бэрэсидьиэнэ В.В. Путин мэтириэттээх истиэнэҕэ ыйанар чаһылары туруордулар.

Кыра саастаах уолаттарга муҥутуур кыайыылааҕынан тустуук Другиннар династияларын салҕааччы Славик Другин утарсааччыларын барытын кыайан, бастакы миэстэҕэ таҕыста. Орто саастаахтарга Сандал Старостин иккис кыһыл көмүс мэтээлин кэттэ. Улахан саастаахтарга, эрдэттэн сэрэйэллибитин курдук, Максим Аммосов финалга Виктор Петрову хотон, кыайыылааҕынан таҕыста.

Тустууга оҕолор ортолоругар күрэх аны кэлэр ыйга Элгэскэ ыытыллара былааннанар.

Америкаттан кэлбит тустуук ыалдьыттарбыт Амматтан кыайыы көтөллөөх төнүннүлэр

Амма улууһугар атырдьах ыйын 5 кунүттэн саҕалаан икки күн устата Америка Холбоһуктаах Штаттарыттан Орегон эдэр тустууктара тренердэрин кытта ыалдьыттаатылар.

Ыалдьыттары Амма кыраныыссатыгар арыылаах алаадьынан, кыынньар кымыһынан көрүстүбүт. Кинилэри бэйэбит биир дойдулаахпыт Семён Адамов арыаллаан аҕалла.

Тустуук оҕолор саха балаҕаныгар эбиэттээтилэр, улуус баһылыгын кытта ирэ-хоро кэпсэттилэр, Амма 1 нүөмэрдээх оскуолатыгар сырыттылар. Биллэн турар, Амма кэрэ айылҕатыгар дуоһуйа сынньаннылар.

Улуус киинин «Дружба» комплексыгар Амма — Орегон тустууга табаарыстыы көрсүһүүгэ элбэх киһи тоҕуоруһа мустан, ыһыылаах-хаһыылаах киирсиилэр буоллулар.

Биһиги оҕолорбут кыахтара баарынан сөптөөх утарсыыны оҥордулар эрээри, ыалдьыттарбыт маастарыстыбалаах тустууну көрдөрөн, уопсай ахсааҥҥа инники тахсан үөрүүлэрэ үрдээтэ. Амма кэрэ сирэ кинилэргэ кыайыыны биэрэн, дойдуларыгар айаннаатылар.

Ыалдьыттары аммалар алгыс тылынан арчылаан атаардылар.

Спортсменнарбыт өрөспүүбүлүкэтээҕи күрэхтэһиилэргэ ситиһиилээхтик кытталлар

Булуҥ оҕолоро өрөспүүбүлүкэ таһымнаах күрэхтэргэ ситиһиилээхтик кытталлара кэнники кэмҥэ кими да соһуппат. Ол курдук, ыам ыйын бүтүүтэ Булуҥ эдэр спортменнара чэпчэки атлетикаҕа уонна тустууга күрэхтэһэ Дьокуускайга көппүттэрэ.

Мэҥэ-Хаҥалас Тумулугар ыам ыйын 27 күнүгэр оскуола оҕолоругар чэпчэки атлетикаҕа өрөспүбүүлүкэтээҕи күрэхтэһии буолан ааста. Бу күрэххэ биһиги улууспутуттан Күһүүр орто оскуолатын 8 уонна 10 кылаас үөрэнээччилэрэ ситиһиилээхтик кытыннылар. Хоту улуустартан Булуҥ улууһа соҕотоҕун кыттыыны ылбытын бэлиэтиир наада.

Илин эҥэргэ буолбут күрэхтэһиигэ Фомина Дарья 2 км уһуннаах дистанцияҕа сүүрэн, уһун тыыннааҕын биллэрэн, финиш биэтэгэр иккиһинэн кэллэ. Онтон Варламова Валерия кылгас дистанцияҕа туох баар күүһүн ууран, 300 м буулдьалыы түһүнэн, иккис буолары ситистэ. Бу күрэххэ быһа холоон 120 үлүһүйэн дьарыктанааччылар мустан, ким быһый атахтааҕын быһаарыстылар.

“Өрөспүүбүлүкэ таһымнаах күрэхтэһиигэ бу бастакы сүүрээһиммит буолар. Мин бэйэм сүүрбүт дистанциябар 58 сөкүүндэни көрдөрбүтүм, онтон дьүөгэм Даша уһун сүүрүүгэ 9 мүнүүтэ курдук бириэмэнэн кэлбитэ. Бириэмэбит түмүгүн көрөн астынныбыт. Сүүрээри туран “хотторорум буолуо” диэн санаа үөскүү сылдьыбыта. Аан маҥнай биһигини сүүрүүгэ уһуйбут киһинэн буолар физкултуура учуутала Жирков Иван Романович”, – диэн Валерия Варламова кэпсиир.

Бу кыргыттар кыра саастарыттан саҕалаан сүүрэллэрин КСК тренерэ Жан Самойлов этэр. Ол курдук, улууска үгэс буолбут “Өбүгэ оонньуутугар” кинилэр куруук бочуоттаах миэстэлэртэн түспэттэр. “Кыргыттарбыт өрөспүүбүлүкэ таһымнаах күрэхтэһиигэ маҥнайгы кыттыылара буолар. Кинилэр салҕыы ХХ төгүлүн ыытыллаары турар “Манчаары оонньууларыгар” сүүмэрдиир күрэххэ кыттыахтара”, – диэн бэлиэтээн этэр кини. Кыргыттары күрэххэ чэпчэки атлетика тренерэ Василий Новгородов бэйэтин кытта илдьэ сылдьан сүбэ-ама биэрэр, дьарыктыыр.

Ыам ыйын 27 күнүгэр Арассыыйа чемпионун В.П. Керемясов бирииһигэр, улаатан эрэр тустуук уолаттарга Тулагы-Киллэм сэлиэнньэтигэр тустууга аһаҕас турнир буолан ааста. Бу турнирга биһиги кыра тустуукпут Андреев Айыллаан хотуулаахтык тустарын өссө төгүл дакаастаата. Икки сыл устата тустуу албастарыгар үөрэммит уол, туох баар сыратын ууран, бочуоттаах үһүс миэстэҕэ таҕыста. Санатан эттэххэ, эдэр тустуук элбэх улахан таһымнаах күрэхтэһиилэри билбит, ааспыт уол. Холобура, бу соторутааҕыта Бурятия Кижинги куоратыгар ыытыллыбыт турнирга кыайыылаахтык тустубута.

“Айыллаан 2 кылааска үөрэнэ сылдьан бастакы дьарыгын миэхэ саҕалаабыта. Билигин кини Егор Никандров илиитигэр киирбитэ. Миэхэ дьарыктанар кэмигэр талааннааҕа, чаҕылхайа харахха быраҕыллар этэ. Эр киһилии кытаанах майгылааҕа-сигилилээҕэ тустуу курдук ыарахан көрүҥҥэ лоп курдук барсар. Этэҥҥэ сырыттаҕына үчүгэй тустуук тахсыа”, – диэн Жан Александрович бэйэтин санаатын этэр.

Көбүөргэ – аҕам саастаахтар

ХИФУ профессора Н.К.Алексеев-Матбор бирииһигэр көҥүл тустууга өрөспүүбүлүкэ бэтэрээннэргэ 5-с чемпионата кулун тутар 27 күнүгэр Дьокуускай куорат 3 №-дээх спортивнай оскуолатын тустууга саалатыгар ыытылынна.

Тустуу түһүлгэтэ үгэс быһыытынан ССРС спордун маастара Владимир Дмитриевич Данилов – Бэһиэлэйдээх Болуодьа алгыһынан уонна оһуохайынан саҕаланна.

Бу күрэхтэһии сылтан сыл ахсын кыттааччытын ахсаана элбээн иһэрэ киһини кэрэхсэтэр. Ол курдук, быйыл барыта 73 бөҕөс күөн көрүстэ. Кинилэр саастарынан биэстии сыл арытыалаах алта бөлөххө арахсан, 58-63-69-76-85-97 кг ыйааһыннарга кииристилэр. Күрэхтэһиини көҕүлээн ыыппыт Дьокуускай 3 №-дээх спортивнай оскуолатын дириэктэрэ Федот Архипович Соловьев: “Биһиги маннык күрэхтэһиибит – Уһук Илин федеральнай уокурукка соҕотох күрэхтэһии. Бу биһиги, сахалар омук быһыытынан эмиэ биир уратыбыт. Өскөтүн куорат тренердэрэ күннэтэ көбүөргэ эрчиллэ сылдьар эбит буоллахтарына, тыа дьоно күүстээх хары үлэтигэр эриллэн баран күрэхтэһэ кэлэллэрэ баар суол. Кинилэри мин дьиҥнээх эр бэртэрэ дии саныыбын. Кинилэр – дьиҥнээх көҥүл тустуу силиһэ буолан, биһиги оҕолорбутугар уонна эр дьоммутугар халыҥ хахха, суон дурда, тустуубут уҕараабат өйөбүллэрэ буолаллар”, — диэн күрэхтэһии суолтатын быһааран биэрдэ.

Бэһис чемпионакка аан дойду чемпионнара уонна призердара Федот Соловьев (Дьокуускай), Ефрем Ефремов (Амма), Василий Алексеев, Николай Григорьев (иккиэн – Дьокуускай), Виктор Черкашин (Уус Алдан), Василий Пахомов (Горнай) ситиһиилээхтик кытыннылар. Кинилэри тэҥэ урукку кэмҥэ Сойуус, Россия улахан таһымнаах көбүөрдэригэр эриэ-дэхси көрдөрүүлэнэ сылдьыбыт ССРС спордун маастардара: Дмитрий (Винокуров) Чаҕаан, Семен Федоров (Чурапчы), Валентин Константинов (Горнай), Алексей Максимов, Семен Павлов (Сунтаар), Михаил Тихонов (Мэҥэ Хаҥалас), Егор Красильников, Геннадий Егоров (Дьокуускай) уо.д.а. пьедестал үктэлигэр таҕыстылар. Билигин да эдэрдии эрчимнэрин ыһыктыбакка сылдьар чөл олох аргыстаах аҕам саастаах боотурдар кэтэһэн-манаһан турбат сэргэх тустуулары көрдөрдүлэр. Ол курдук, тутуһуохча буолан иһэн халбарыйан түһэрии, хамсата түһэн баран өттүктээн кубарытыы, атаҕынан көмөлөһүннэрэн накааттаан эргитии курдук, билигин бэл эдэрдэр сэдэхтик туттар албастарын “оҕонньоттор” этэргэ дылы, утуйа да сытан оҥоруох курдуктар.

“Скорость Дима”, “Движение Баанньа”, “Дедушка”, “Яснай”… онтон да атын, тустууну сэҥээрээччилэр эйгэлэригэр биллибит таптал ааттаах бөҕөстөр эдэр саастарын эргитэн бар дьонноругар билигин даҕаны буорахтара кураанаҕын көрдөрдүлэр. Оттон көбүөргэ хапсыһыы хаамыытын биллиилээх бөҕөс, ССРС спордун маастара, бэтэрээн-маастардарга аан дойду чемпиона Захар Чукров кэпсээн, билиһиннэрэн интэриэһи үөскэттэ.

Балаһыанньа быһыытынан хамаанданан түмүк таһаарылынна. Онуоха Дьокуускай – бастакы, Сунтаар – иккис, Нам – үһүс миэстэлэри ыллылар.

Петр ПАВЛОВ

Ааптар хаартыскаҕа түһэриилэрэ

Иван Ярыгин аатынан норуоттар икки ардыларынааҕы турнир. Бастакы күн

http://www.youtube.com/watch?v=WOwGaIzlU34&list=PLcD4Va-hAuv9SWoIMR5HiChYmCo9KwN-n

10.00.

Үтүө күнүнэн, тустууну таптааччылар! Тустуу бырааһынньыга саҕаламмытынан барыгытыгар эҕэрдэ. Турниры суругунан сырдатыыны саҕалыыбыт.

Күрэхтэһии саҕаланыыта саалаҕа Ил Дархан Егор Борисов киириитин элбэх ахсааннаах ыалдьааччылар уруйдуу көрүстүлэр.

Биһиги бөҕөстөрбүтүттэн бастакынан көбүөргэ Эдуард Григорьев таҕыста. Кини утарсааччыта — американец Тони Рамос. Тустуу А көбүөргэ буола турар. Бастакы үс мүнүүтэлээх тустууга американеһы сэрэттилэр, онон биһиги уолбутугар биир очукуо ааҕылынна (1:0). Онтон иккис түһүмэххэ киирэн көбүөр таһыгар үтэн таһааран өссө икки очукуону сурунна. Ити курдук хапсыһыы бүтэрэ аҕыйах сөкүүндэ хаалбытын кэннэ 3:0 ахсаанынан кыайан иһэн атахтатан кэбиһэн, судьуйалар ааҕыыларынан ахсаан 3:2 буолла. Ол кэмҥэ американец тренерэ Терри Брэндс сөбүлэспэккэ кубик бырахта. Ону судьуйалар өр соҕус көрөн, үөрэтэн баран, Рамоска икки баалы биэрдилэр. Онон уолбут 3:4 ахсаанынан хотторон кыһыылаахтык хотторон кэбистэ.

Бу кэнниттэн тута көбүөргэ Арыйаан Тютрин уонна Тамерлан Караев таҕыстылар. Сүрдээх тыҥааһыннаах киирсиигэ уолбут 5:2 ахсаанынан кыайыыны ситистэ. Караев элбэх ыйааһыны түһэринэн баран кыайан чөлүгэр түспэтэ диэххэ сөп.

Аны көбүөргэ бэйэбит уолаттарбыт Айхан Антонов уонна Николай Охлопков таҕыстылар. Бу киирсиигэ Охлопков 7:0 кыайда. Кинилэр туста сылдьар кэмнэригэр диктор бочуоттаах ыалдьыттар ложаларыгар Саха Өрөспүүбүлүкэтин баһылыга Егор Афанасьевич Борисовы билиһиннэрдэ. Кини кэнниттэн Россия хамаандатын сүрүн тренерин эбээһинэһин толорооччунан анаммыт Дзамболат Тедееви билиһиннэрдилэр.

11.05.

Салгыы күрэхтэһиигэ Дмитрий Аксенов бурят Тамир Гармаевка 10:12 ахсаанынан хотторон кэбистэ. Манна биһиги уолбут бастакы түһүмэх түмүгүнэн 4:0 кыайан иһэн, накаакка түбэһэн элбэх баалы биэрэн кэбистэ. Онтон кэлин түһүөлүү сатаата да, бириэмэ бүтэн хаалла. Хайдах эрэ табыллан тустубата.

Аны бэйэбит уолаттарбыт Владимир Флегонтов уонна Борис Семенов таҕыстылар. Билэргит курдук кинилэр былырыын эмиэ маҥнайгы эргииргэ бэйэ-бэйэлэрин кытта тустубуттара. Ити иккис ыйааһыҥҥа этэ. Онно кыайыыны Флегонтов ситиспитэ. Бу сырыыга Владимир 4:6 ахсаанынан хотторон иһэн, бүтэһик сөкүүндэҕэ киһитин кууһан ылан, быраҕан ыраастык түһэрдэ.

Онон салгыы эргииргэ Николай Охлопков — Александр Богомоевы, Владимир Флегонтов — Тамир Гармаевы кытта тустар буоллулар. Саха сирэ — Бурятия микро-матч буолар буолбут диэххэ сөп.

Бу ыйааһын бастыҥа Исмаил Мусукаев тувинец Дондук Оолга 7:8 ахсаанынан хотторуута турнир бастакы сенсациятынан буолла. Дондук Оол — былырыын Минскэйгэ, А.Медведь турнирыгар биһиги Владислав Андреевпытын кыайан турар.

Ньургун Александров эдэрдэргэ Россия чемпиона, аан дойду призера Гаджимурад Рашидовка, бэрт наҕыллык барбыт хапсыһыыга 1:6 ахсаанынан хотторон кэбистэ. Ол кэнниттэн тута Виктор Рассадин уонна Расул Машезов таҕыстылар. Виктор атахха суптурута түһүөлээн, бастакы түһүмэҕи 6:0 оҥордо. Онтон иккискэ киирэн эмиэ сытыытык түһүөлээн, киирсиини болдьоҕун иннинэ 10:0 ахсаанынан, очукуонан ыраастык кыайда. Уолбут бэрт сибиэһэйдик, сэргэхтик тустан, үчүгэй өйдөбүлү үөскэттэ.

Онон салгыы эргииргэ Охлопков — Богомоев, Гармаев — Флегонтов, Ферзалиев — Дондук Оол, Рашидов — Виктор Рассадин киирсэр буоллулар.

12.15

Күрэхтэһии бастакы күнүгэр алта ыйааһыҥҥа (эр дьоҥҥо — икки, дьахталларга — түөрт) сэттэ дойдуттан барыта 108 бөҕөс кыттарын туһунан иһитиннэрдилэр. Ол курдук, АХШ, Греция, Япония, Казахстан, Италия, Монголия уонна Россия бөҕөстөрө бааллар. Греция биир кыттааччылаах эбит буоллаҕына, Россия хамаандата 69 спортсменнаах.

Бочуоттаах ыалдьыттары: Юрий Шахмурадовы, Александр Борзунову, Анатолий Белоглазовы, Павел Пинигини билиһиннэрдилэр.

Александр Рассадин — Юлиан Гергенов. Эдэр уолбут кыайан аһыллан тустубата, 0:6 ахсаанынан сабырыйтарда. Киниэхэ бу турнир улахан уопут буолара сэрэйиллэр.

Кинилэр кэннилэриттэн көбүөргэ Артем Гебеков уонна Азамат Тускаев таҕыстылар. Бу хапсыһыы — 57 киилэ биир күүтүүлээх киирсиитинэн буолар. Ол гынан баран, Тускаев тугу да оҥорбото. Гебеков дэлби үлэлээн, атахтаан, накаттаан, кириэстээн, ахсааны 10:2 оҥордо.

Арыйаан Тютрин — Зоригто Булдаев. Бурят уола Россия эдэрдэргэ кыайыылааҕа. Уолбут утарсааччытын очукуонан ыраастык кыайда.

Онон эрдэ эппитим курдук, финал 8/1 Охлопков — Богомоев, Гармаев — Флегонтов, Ферзалиев — Дондук Оол, Рашидов — В.Рассадин, Аказава (Япония) — Исрапилов, Даниел (АХШ) — Ампар, Гергенов — Гебеков, Омак — Тютрин көрсөр буоллулар.

13.15

Хомойуох иһин Николай Охлопков Александр Богомоевка күттүөннээх утарсыыны оҥорбото. Ол гынан баран, Богомоев финалга тахсар түгэнигэр уолбут салгыы үһүс миэстэ иһин тустуон сөп. Салгыы киирсиигэ Владимир Флегонтов Бурятия эдэр кэскиллээх тустууга Зоригто Булдаевы кыахтаахтык кыайда. Атахха суптурута түһүөлээн кэбистэ. Очукуонан лаппа хотон иһэн, устунан ыраастык уурда.

Онон финал чиэппэригэр Александр Богомоев — Владимир Флегонтов көрсөр буоллулар.

Виктор Рассадин — Гаджимурад Рашидов. Бастакы түһүмэххэ бөҕөстөр аһара сэрэнсэн туһуннулар. Онуоха көҕө суох диэн Рашидовка сэрэтии биэрдилэр. Онон Рассадиҥҥа биир баал бэрилиннэ. Иккискэ киирэн биир түгэҥҥэ көбүөр таһыгар таһааран дагестанец ахсааны тэҥнээтэ (1:1). Онтон биһиги уолбут бэлэмэ суох атахха киирбитигэр Рашидов тиэрэ анньан икки баалы сурунна. Тусталлара биир мүнүүтэ курдук баара. Ол эрээри, Виктор тустууну сытыырхаппата. Аҕыйах сөкүүндэ хаалбытын кэнниттэн кииртэлии сатаата да, кыаллыбата. Онон хотторон кэбистибит. Төһө эмэ бириэмэ баарын үрдүнэн ыга сатаабата.

Арыйаан Тютрин — Омак Сюрюн. Уолбут киирсэ сатаата да 2:6 ахсаанынан хотторон кэбистэ. Ол да буоллар, үчүгэй өйдөбүлү хаалларда.

Онон финал чиэппэригэр Богомоев — Флегонтов, Дондук Оол — Рашидов, Исрапилов — Ампар, Гебеков — Сюрюн тустуохтара.

15.00

Богомоев – Флегонтов. Уолбут тустууну үчүгэйдик саҕалаата. Ол гынан баран, муннуттан хаана кэлэн хаста да быраастана сырытта. Онон тустуу тэтимэ ыһылла сырытта. Сыыһата диэн, атахтыырыгар уунан хаалан, бэйэтэ аллараа буолан хаалар. Итинник, икки төгүл наһаа боростуойдук кииртэлээн биэрдэ. Онон уопсай түмүккэ 2:6 ахсаанынан хотторон кэбистэ.

Салгыы киирсиигэ Рашидов Дондук Оолу бэрт кыахтаахтык кыайан, балаһыанньатын лаппа тупсарда. Финал аҥарыгар Богомоев – Рашидов буолла. Хайалара да кыайар түгэнигэр биһиги уолаттарбытыттан Охлопков, Флегонтов – Александров, Рассадин бу бөлөххө үһүс миэстэ иһин тустар кыахтаахтар.

Салгыы күрэхтэһиигэ Ампар – Исрапиловы, Гебеков – Сюрюну кыайан, финал аҥарыгар тахсан бэйэ-бэйэлэрин кытта тустар буоллулар.