Абый улууһун кыстыгар ыксаллаах балаһыанньа. Сүөһү-сылгы, таба иитиитигэр уустуктар үөскээтилэр.
Абыйдар бэйэбит күүспүтүнэн уонна республика үрдүкү салалтатын көмөтүнэн кыстыгы эриһэн-мускуһан туоруохпут. Бу уустук кэмҥэ сыччах хас биир киһиттэн эрэл санааны күүһүрдүү, кыаллыбаты кыайыы, сатаабатаҕы сатааһын, тиритэ-хорута үлэлээһин эрэ ирдэнэр. Маны таһынан ыксаллаах быһыы-майгы усулуобуйатыгар хайаан да түмсүүлээх уонна салалталыын биир сомоҕо буолуохтаахпыт өйдөнөр.
Бу күннэргэ оройуон салайааччылара туох да омуна суох эттэххэ, сынньанары билбэккэ үлэлии олороллорун илэ харахпынан көрдүм. Сүүрүү-көтүү, телефон үөһэ телефон, сүбэлэр-амалар, ардыгар, бэрт кытаанах хамаанда эмиэ иһиллэр. Онуоха эбии Орто-Халыматтан «МИ-8» вертолет кэлэн нэһилиэктэргэ сүөһүгэ-сылгыга уотурба, эбиэс илдьэр, бензин тириэрдэр.
Нэһилиэктэринэн сыыппаралар манныктар: «Абый» нэһилиэгэр дороххой аһылык 2 тн. эбиэс 480 кг., уматык 2,5 тн. «Мойуордарга» уонна «Муҥурдаахтарга» тустааҕынан эмиэ маннык көрдөрүү. «Уолбуттарга» дороххой аһылык уонна уматык 2,5 тн.
Табаларга тохтуохха. «Майыартан» 9 көс ыраах сытар «Лүҥкүдэ» таба ыстаадатыгар балааккаҕа олорон үлэлиир 4 табаһыт 629 төбө табалаах. Бу күһүҥҥү хараалга ахсаан өссө чуолкайданыаҕа. Түөрт буранынан Майыартан дьаһалта тыа хаһаайыстыбатын специалиһа С.С. Сидоров, «Опора» родовой община биригэдьиирэ М.К. Лебедева, оройуоннааҕы ветеринарнай лаборатория бырааһа Р.А. Слепцов ас-үөл, эмп-томп тиэнэн табаһыттарга аттаннылар.
Ил Дархан Егор Борисов кыттыылаах күчүмэҕэй кыстык балаһыанньатыгар аналлаах улахан селекторнай мунньах ыытыллар.