Хамнас кэмигэр кэлбэт, үлэ миэстэтэ көстөрө күчүмэҕэй кэмигэр, ким барыта тугу эрэ оҥорон туһаҕа таһаарыан, кыралаан да буоллар харчылаһыан баҕарар. Маныаха Эдьигээҥҥэ бэрт туһалаах тэрээһин ыытыллан, дьон-сэргэ санаата көнньүөрдэ, сэргэхсийдэ.
Улууска нэһилиэнньэ дьарыктаах буолуутун киинин ыҥырыытынан, Намтан «Эрэл» үөрэтэр киин дириэктэрин үөрэх чааһыгар солбуйааччы Т.А. Карамзина кэлэн үлэтэ суохтарга, инбэлииттэргэ, биэнсийэлэригэр олорооччуларга бэртээхэй кууруһу тэрийдэ.
—Маннык үөрэх кииннэрэ Нерюнгрига, Чурапчыга бааллар уонна өрөспүүбүлүкэ бары улуустарын кытта дуогабарынан үлэлииллэр. Үлэтэ суохтарга, кырачаан оҕолорун көрөн олорор ийэлэргэ, биэнсийэлэригэр олорооччуларга анаан үс тус-туһунан хайысханан бырагыраамалардаахпыт. Итиэннэ ол чэрчитинэн, улуустарга дьарыктаах буолуу кииннэрин кытта тиһиктээхтик үлэлэһэбит. Куурустары миэстэтигэр тиийэн тэрийэбит.
Бу сырыыга мин түү (шерсть) сабы анал иннэнэн хатайдаан, мыылалаах суурадаһыныны эмиэ туһанан, имитэн, араас оҥоһуктары оҥорон таһаарарга үөрэтэбин. Наадалаах матырыйаалынан толору хааччыйабын. Бу бырагыраама уон хонуктаах. Ол кэм устата истээччи берет бэргэһэ, тапочка, үтүлүк, суумка, оонньуур оҥорорго үөрэнэр. Кууруспар 15 истээччилээхпин. Кыра оҕолоох ийэлэр, икки инбэлиит, үс биэнсийэҕэ олорор дьон бааллар. Кууруһу түмүктүүргэ эксээмэн тутабын уонна сэртипикээт биэрэбин,- диэн кэпсиир Татьяна Алексеевна.
Кууруска сылдьааччылар бэргэһэ, тапочка оҥостон бүтэрбиттэрин астынан, киэн туттан көрдөрдүлэр, кэпсээтилэр. Суумка саҕалаан эрэллэрин көрдөрдүлэр. Нэдиэлэ бүтүүтэ сыраласпыт үлэлэрин түмүгүн дьон көрүүтүгэр таһаардылар, бэртээхэй быыстапка оҥордулар. Дьэрэкээн оһуордаан-мандардаан киэргэппит бэргэһэлэрэ, атахтарын таҥаһа, оонньуурдара, суумкалара болҕомтону тарта. Көрөөччүлэр улаханнык сэҥээрдилэр, үлэһиэн баҕалаахтар да көһүннүлэр.
