Алампа айымньылара сүрэҕи-быары долгуттулар

870

Тыл сүдү маастара, улуу бэйиэт, прозаик, драматург А.И.Софронов-Алампа төрөөбүтэ 130 сылынан Таатта улууһун нэһилиэктэрин икки ардыгар тэрээһин уоттаахтык-күөстээхтик салҕанар. Соторутааҕыта нэһилиэктэр икки ардыларыгар Алампа суруйбут драмаларын оонньоон көрдөрүүгэ күрэстэһии ааттааҕа ыытыллыбыт. Бу туһунан Боробул бөһүөлэгин бибилэтиэкэрэ Галина Другина иһитиннэрдэ.


Куонкурус Дьохсоҕон нэһилиэгэр «Алампа» аатынан култуура уонна спорт киинигэр буолла. Дэбдиргэлэр — «Кэччэгэй кэриэһэ суох», туора күөллэр — «Нууччатымсыйбыт», уолбалар — «Таптал», дьохсоҕоннор «Олох дьэбэрэтэ» драмалары ис сүрэхтэриттэн кыһаллан, үчүгэйдик, умнуллубаттык оонньоон көрдөрдүлэр. Сыанаҕа тахсан саҥаран-иҥэрэн, туттан-хаптан оонньуулларын көрөөччүлэр сүрэхтэринэн-быардарынан ылыннылар, улаханнык астыннылар, — диир Галина Николаевна.

Түмүккэ, эр дьоҥҥо оруолларын чаҕылхайдык толорбут Петр Захаров (Дьохсоҕон), Иннокентий Заболоцкай (Дэбдиргэ), дьахталларга уһулуччу үчүгэйдик оонньообут Майя Беленкова (Дьохсоҕон) «Бастыҥ оруол», талба талааннаах Алексей Аржаков (Уолба) «Кэскиллээх артыыс» диэн анал ааттар хаһаайыннарынан буолбуттар. Биһирэбил бирииһи Дэбдиргэ хамаандата ылбыт. Дьохсоҕоннор дьоро киэһэ муҥутуур кыайыылааҕынан тахсаннар үөрбүттэр.

Дьүүллүүр сүбэҕэ Тааттатааҕы норуот тыйаатырыгар үлэлээбит Светлана Михайлова (Ытык Күөл), «Таатта» хаһыат кэрэспэдьиэнэ Виктор Винокуров (Ытык Күөл), сыана бэтэрээнэ, олоҥхону, оһуохайы киэҥ эйгэҕэ тарҕатааччы Валентина Харайданова (Дьохсоҕон) үлэлээбиттэр.