Таатта улууһун Дьохсоҕон нэһилиэгэр улуу бэйиэт, прозаик, драматург А.И.Софронов — Алампа төрөөбүтэ 130 сылынан тэрээһиннэр тиһиктээхтик ыытыллыбыттарын туһунан култуура, спорт киинин дириэктэрэ Изабелла Жараева, нэһилиэк бибилэтиэкэрэ Галина Другина иһитиннэрдилэр.
—Тэрээһиннэргэ нэһилиэкпит общественнай түмсүүлэрэ, түөлбэлэр улахан көмөнү, өйөбүлү оҥордулар. «Алаас ааттаах, дойду сурахтаах» диэн эдэр ыччакка уонна оскуола үрдүкү кылааһын оҕолоругар аналлаах сэргэх ток-шоу ыытыллыбыта. Кэнчээри ыччат манна ох курдук оҥостон кэлбитэ сүргэбитин көтөхпүтэ. Бу ытык киһи айымньыларыгар, төрөөбүт дойдуларын билиигэ-көрүүгэ тургутуһар киирсии олус сытыытык, уоттаахтык-күөстээхтик барбыта астыннарар. Аҕам саастаахтар, хаһан баҕарар буоларын курдук, бары тэрээһиннэргэ куруук көхтөөхтүк кытталлар. Кинилэргэ Алампа уонна Суорун Омоллоон айымньыларынан бэртээхэй викторина буолан ааспыта. Викторинаҕа кыттааччыларбыт олус сөбүлээннэр, кэлэр өттүгэр ыаллыы нэһилиэктэри кытары күрэһи тэрийэргэ этии киллэрбиттэрэ. «Ааҕар дьиэ кэргэн» куонкуруска хас түөлбэ аайыттан дьиэ кэргэнинэн оҥостон, бэлэмнэнэн кыттыбыттара. Кинигэ бөҕөтүн аҕалан көрдөрөн, кэпсээн сэргэх сэһэргэһии тахсыбыта. Итиннэ ыытыллыбыт кинигэ быыстапкатын кэлбит ыалдьыттар бары улаханнык сэҥээрэн көрбүттэрэ, — диир Изабелла Жараева.
Кэпсээбиттэринэн, «Ийэ буорбар эргиллиэм, төрүт буорбар төннүөм» диэн улууска ыытыллыбыт хоһоон ааҕыытын күөн күрэһин бастыҥ ааҕааччытыгар, Дьохсоҕон ыччатыгар Егор Дуракиновка нэһилиэк баһылыгын кылаан бирииһэ — убаһа бар дьонун ортотугар туттарыллан, үөрүү-көтүү өрөгөйө буолбут. Маны сэргэ, Акулина Порядина, Лилиана Макарова сертификаттарынан наҕараадаланан ытыс тыаһынан арыалламмыттар. Маныаха быйыл сайын дьиҥ сахалыы тыыннаах ырыа түһүлгэтин кыайыылааҕынан буолбут Егор Жирковтарынан эмиэ киэн туттан ааттыыллар.
Галина Другина сайын лааҕырга сылдьыбыт оҕолор «Олоҥхо дойдутугар айан» куонкуруска, «Алампаны ааҕабыт» хоһоон ааҕыытыгар көхтөөх кыттыыны ылбыттарын, нэһилиэккэ куонкурустар, кроссворд арааһа, викториналар болҕомтону тардыбыттарын этэр. Кини Дьохсоҕоҥҥо ыытыллыбыт тэрээһиннэри киллэрбэккэ туран бэлиэтииринэн, түөрт — улуус, биир өрөспүүбүлүкэ таһымнаах куонкурустар өрө көтөҕүллүүлээхтик буолан ааспыттар.
«Киэн туттар биир дойдулаахпыт Алампа сырдык аатын үйэтитэр, кини аатырбыт айымньыларын дьонугар-сэргэтигэр, норуотугар тарҕатар сыаллаах-соруктаах үлэлэрбит түмүктэрэ үчүгэйдэр диэн үөрэбит. Туруоруммут сорукпутун кыахпыт баарынан толордубут дии саныыбыт», — дэһэллэр Изабелла Семеновна уонна Галина Николаевна.