Амма тустууктара Үлэ уонна Тупсаран оҥоруу сылын өйүүллэр

302

2018 сылга буолуохтаах Саха сирин норуоттарын 7-с Оонньуларын көрсө быйыл Амма улууһугар Үлэ уонна Тупсаран оҥоруу сыла биллэриллибитэ.


Биллэриллибит сыл чэрчитинэн Аммаҕа  ырааһырдыы үлэлэрэ, субуотунньуктар быыстала суох ыытыллаллар.

Бу күннэргэ Ил Түмэн дьокутаата Алексей Филиппов, Амма спортивнай оскуолатын директора Ньургун Иванов көҕүлээһиннэринэн, араас сиргэ олорор Амма тустууктара мустан, бөһүөлэк тас көстүүтүн буортулаан турбут эргэ уопсай дьиэни көтүрдүлэр.

Тустууктар бу үлэлэрин буор босхо оҥордулар уонна тэрилтэ үлэһиттэригэр ыҥырыы таһаардылар. «Аммабыт көстүүтүн тупсарыаҕыҥ! Тэрилтэ салайааччылара, биһиги үтүө бачыыммытын өйөөҥ«, — диэн ыҥырыыга этиллэр.

Биир сомоҕо буолан кыттыстахпытына эрэ, үлэ хаамыыта көдьүүстээх буоларын аммалар билэбит.