Анаабыр улууһун олохтоохторо таба иитиитин инники кэскилин түстүүр мунньахха кыттыыны ыллылар

364

Дьокуускай куоракка СР табаһыттарын III съеһэ буолла. Манна Анаабыр улууһуттан баһылык Иван Семенов салайааччылаах делегация кыттыыны ылла.


Анаабыр оройуонуттан “Анаабыр улууһа” МТ баһылыга Семенов И.И., тыа хаһаайыстыбатын управлениетын салайааччыта Неустроев А.В., уонна И.К.Спиридонов аатынан МУП 8 табаһыта уонна чуум үлэһиттэрэ талыллан кыттыыны ыллылар. Ол курдук, 3№-дээх ыстаадаттан, 30-с сылын таба иитиитигэр үлэлиир Туприн Афанасий Спиридонович; 2№-дээх ыстаадаттан, 11-с сылын таба иитиитигэр үлэлиир Туприн Степан Николаевич; 4№-дээх ыстаадаттан, 40-ча сыл таба иитиитигэр үлэлиир, билигин саҥа “Буурдаах” ыстаадатын тэриммит Туприн Дмитрий Иванович; 7№-дээх ыстаадаттан, 25-с сылын таба иитиитигэр үлэлиир Туприн Роман Дмитриевич; 7№-дээх ыстаада эдэр бостууга, быйыл оскуоланы үөрэнэн бүтэрэн бастакы сылын бостуугунан үлэлиир Туприн Иван Романович; 2№-дээх ыстаадаттан чуум үлэһитэ 3 разрядтаах табаһыт, таба иитиитигэр 35-с сылын үлэлиир Попова Парасковья Карповна, кини кэргэнэ Валериан Николаевич 2№-дээх ыстаада биригэдьиирэ, уолаттара Карп уонна Анатолий иккиэн таба иитиитигэр үлэлииллэр; 3№-дээх ыстаада чуум үлэһитэ, 3 разрядтаах табаһыт, таба иитиитигэр 25-с сылын үлэлиир Спиридонова Анна Ануфриевна; 4№-дээх ыстаада чуум үлэһитэ, 3 разрядтаах табаһыт, таба иитиитигэр 6-с сылын үлэлиир Туприна Марианна Васильевна.

Съезд үлэтигэр хоту дойду хоодуот үлэһитин барыларын кэриэтэ долгутар боппуруостар этилиннилэр. Ол курдук, бөрө мэнээктээн таба иитиитигэр кутталы үөскэтэрин, табаһыт хамнаһа кыратын уонна үлэһит аҕыйаҕын бэлиэтээтилэр. Олох ирдэбилинэн, саҥа технологиялары олоххо киллэрэн туттуохха сөбүн эттилэр.

СР табаһыттарын ассоциациятын президенинэн Өлүөхүмэ оройуонун Тээнэ национальнай нэһилиэгин МТ баһылыгын Николаев Арсентий Прокопьевыһы таллылар уонна РФ табаһыттарын IV съеһигэр делегаттары бигэргэттилэр.

Съезд үлэтин биир үөрүүлээх түгэнинэн олохторун таба иитиитигэр анаабыт, өр кэмҥэ үтүө суобастаахтык улуус социальнай-экономическай сайдыытыгар үлэлээн дьоһун кылааты киллэрбит дьону эҕэрдэлээһин уонна наҕараадалары үөрүүлээх быһыыга-майгыга туттарыы буолла. Ол курдук, Анаабыр улууһун тыа хаһаайыстыбатын үлэһиттэрэ, “СР агропромышленнай комплексын Бочуоттаах үлэһитэ” түөскэ иилинэр үрдүк бэлиэнэн Туприн Афанасий Спиридонович ; “СР тыатын хаһаайыстыбатын туйгуна” үрдүк бэлиэлэри Туприн Василий Ануфриевич уонна Неустроев Ариан Владимирович; СР тыатын хаһаайыстыбатын министерствотын Бочуоттаах грамотатынан Спиридонова Анна Ануфриевна наҕараадаланнылар.