Дьокуускайга СӨ Национальнай художественнай түмэлигэр М.К. Аммосов аатынан ХИФУ Хотугулуу илиҥҥи олорор норуоттар тылларын уонна култуураларын үөрэтэр институт иһинэн үлэлиир «Уран Иис» үрдүкү маастарыстыбатын оскуолатын» уһуйуллааччыларын быыстапкатыгар 15 улуустан 70 иистэнньэҥ уонна норуот маастара кэлэн, бэйэлэрин айымньылаах үлэлэрин дьон-сэргэ дьүүлүгэр таhаардылар.
Бу саха уонна кыра ахсааннаах хотугу норуоттар иистэнэр үгэстэрин көрдөрөр улахан далааһыннаах быыстапкаҕа Боронуктан (Дьааҥы улууһа) төрүттээх эдьиийдии-балыстыы Жиркова Майя Афанасьевна уонна Другина Раиса Афанасьевна ситиһиилээхтик кытыннылар. Раиса Афанасьевна бу түмсүүгэ бэһис сылын сылдьар, таһымын үрдэтэр. Элбэх быыстапкаҕа ситиһиилээхтик кытынна. Киниэхэ быыстапка аһыллыытын үөрүүлээх кэмигэр 5 сыл «Уран Иис» оскуолатыгар уhуйуллубутун туоһулуур сэртипикээт туттарылынна. Кини оҥорбут кылтан, сиэлтэн үлэлэрэ дьон болҕомтотун улаханнык тарта. Быыстапка үлэтин кэмигэр СӨ норуотун уус-уран оҥоһуктарын маастара буола үүммүт Раиса Афанасьевна баҕалаахтарга маастар-кылаас ыытта.
Оттон Майя Афанасьевна бу улахан быыстапкаҕа аан маҥнайгы сүрэхтэниитэ. Кини икки ат симэҕин толору тигэн, дьоһуннаахтык кытынна. Биир ат симэҕин оҕуруонан уонна бөлтөҕөр тимирдэринэн, иккиһин быысапканан оһуордаан оҥорбута дьон-сэргэ сэҥээриитин ылла, улахан иистэнньэҥ тахсан эрэрин туоhулаата.
Инникитин да «Уран Иис» үрдүкү маастарыстыба оскуолатын» уһуйуллааччыларын элбэх интириэһинэй бырайыактар күүтэллэр. Онон Раиса Афанасьевна уонна Майя Афанасьевна иистэнэр талааннарын таhымын үрдэтэн, айымньылаахтык үлэлээн, өбүгэ ииһин култууратын сөргүтүүгэ өссө да үлэлэһиэхтэрэ диэн эрэнэбин уонна кинилэргэ тус олохторугар дьолу, айымньылаах үлэлэригэр өссө үрдүк чыпчааллары баҕаран туран, махтал тылларын тиэрдэбин!