Арктикатааҕы гимназияҕа үрүҥ уонна кыһыл көмүс мэтээлинэн бүтэрбит үөрэнээччилэри чиэстээһинин үөрүүлээх киэһэтэ буолан ааста. Оскуола кыһатын көмүһүнэн бүтэрээччи оҕолор үөрүүлэрин учууталлар, төрөппүттэр, кинилэр бииргэ үөрэнэр доҕотторо уонна балыс табаарыстара кэлэн тэҥҥэ үллэһиннилэр.
Мэтээллэри туттарыы тэрээһинигэр улуус дьаһалтатын баһылыга Игорь Кудряшов, үөрэҕирии салалтатын салаайыччытын эбээһинэһин толорооччу Матрена Варламова, Арктикатааҕы гимназия дириэктэрин эбээһинэһин толорооччу Светлана Федорова оҕолорго эҕэрдэ тылларын иһитиннэрдилэр.
Оҕолорго аан маҥнайгы эҕэрдэ тылы дириэктэри иитэр-үөрэтэр салааҕа солбуйааччы Светлана Федорова эттэ. Кини оҕолорго туһаайан улахан дьон олоҕор бастакы хардыылары оҥороллорун өссө төгүл санатта. Оскуола дириэктэрэ Наталья Шагланова гимназияны бүтэрээччилэр туох баар улууска ыытыллар тэрээһиннэргэ көхтөөхтүк кытталларын бэлиэтээн туран, устудьуоннуур кэмнэригэр бу курдук үрдүк таһаарыылаах түмүктэри көрдөрөллөрүгэр эппит эҕэрдэ суругун, баҕарбыт баҕа санаатын Светлана Федорова мустубут дьоҥҥо доргуччу ааҕан иһитиннэрдэ.
Тэрээһин саамай күүтүүлээх, долгутуулаах кэмэ – мэтээллэри туттарааһын түгэнэ буолла. Дерябин Денис, Макимов Роман, Данилова Наталья, Кирсанов Никита уонна Мережная Ильяна үөрэх туйгун түмүгүн кэрэһэлиир, үрүҥ, кыһыл көмүс мэтээллэри, грамоталары улуус баһылыгын илиититтэн туттулар. Кинилэр төрөппүттэрэ, оҕолоро үчүгэй үөрэхтэрин иһин, үөрэх салалтатыттан махтал суруктары ыллылар.
Оройуон баһылыга үөрэнээччилэргэ туһаайан: “Олох устааһына мас үүнэрин кэриэтэ. Ол курдук биһиги бэйэбит олохпут суолун силиһиттэн саҕалыыбыт. Маспыт салаатын миэстэтин бэйэбит булабыт. Маны этэн туран, эһиэхэ, хас биирдии бүтэрээччи оҕоҕо, баҕарыам этэ сөбүлүүр идэҕэтин баһылаан, бэйэҕит олоххут сөптөөх миэстэтин, сэбирдэҕин буларгытыгар”, – диэн бэрт мындыр тыллары эттэ.
Матрена Варламова үөрэх туйгуннарын чиэстиир тэрээһиҥҥэ кэлэн турарыттан үөрэрин биллэрдэ уонна оҕолору оскуоланы түмүктээбит күннэринэн эҕэрдэлээтэ. Кылаас салайааччыта, бу сыллар тухары оҕолорго иккис ийэнэн буолбут киһи Галина Чуприна уйадыйан туран баҕа санаатын эттэ уонна педагогическай үлэтигэр бу бүтэһик кылаас буоларын биллэрдэ. Кылаас төрөппүттэрин аатыттан Егор Данилов тыл эттэ: “Бүгүн биһиги оҕолорбут олохторугар аан маҥнайгы улахан ситиһиилэрин көрдүбүт”, – диир кини. Махтал тыллар кылаас салайааччытыгар Галина Андреевнаҕа ананнылар.
Улахан дьон олоҕор бастакы хардыыны оҥороору сылдьар оҕолорго анаан этиллибит алгыстаах тыллар куруук араҥаччылыы сырыттыннар. Оскуоланы түмүктүүр долгутуулаах күнү, олохторун саамай кэрэ түгэнин өйдүү-саныы сылдьалларыгар, хаартыскаҕа түһэн үөрүүлээх киэһэни түмүктээтилэр. Саха сирин бары бүтэрээччи оҕолор өйдөбүнньүк хаартыскалара, урукку выпусктар хаартыскаларын кэккэтигэр киирэн, кэлэр көлүөнэҕэ холобур буолан, оскуола истиэнэтигэр туруо.