«Чолбон» сурунаал айар кэлэктиибэ Уус Алдан улууһугар Танда олохтоох бибилэтиэкэтигэр ыалдьыттаата. Манна уус-уран литературнай сурунаал үлэтин, саха тылын-өһүн уонна аныгы литературатын тула истиҥ кэпсэтии ыытылынна.
Ыалдьыттар бастаан Танда баай экспонаттаах музейыгар сырыттылар. Музей үлэһитэ Ефросинья Колодезникова хас биирдии былыргы тэриллэр, хаартыскалар тустарынан кэпсээнин биһирээн иһиттилэр.
Бу күн олохтоох бибилэтиэкэҕэ Танда нэһилиэгин айар куттаахтарын дьоро киэһэтэ буолла. Мустубут дьону «Чолбон» сурунаал сүрүн эрэдээктэрэ Данил Макеев сурунаал кэлэктиибэ саҥа дьылга үктэнэн баран саҥалыы хайысхалаахтык үлэлиир былааннааҕын туһунан эттэ. Эрэдээктэри солбуйааччы Гаврил Андросов, эппиэттиир сэкирэтээр Айысхаана, салаа эрэдээктэрэ Уйбаан Ойуур сүрдэрэ көтөҕүллэн бэйэлэрин үлэлэрин-хамнастарын, айар үлэлэрин туһунан билиһиннэрдилэр, эдэр ааптардарга анаан сүбэ-ама биэрдилэр, ыйытыыларга хоруйдаатылар уонна хоһооннорун аахтылар. Суруйуу диэн ыарахан идэ буоларын этэн туран, саха литературата сайдарын туһугар дьаныһан дьарыктаныы ирдэнэрин ыйдылар.
Бибилэтиэкэ үлэһиттэрэ, ааҕааччылар «Чолбон» сурунаал олохтоох айар дьону өйүүр, тирэх буолар түгэнэ элбэҕин уонна олохтоох ааптардарга болҕомтолоохтук сыһыаннаһалларын бэлиэтээн, махтал тылларын эттилэр.