Чурапчы бастыҥ үөрэнээччилэрин улуус баһылыга эҕэрдэлээтэ

337

Чурапчы улууһугар бастыҥ үөрэнээччилэргэ анаммыт Баһылык бала “Айылгы» сынньалаҥ киинигэр үрдүк таһымҥа ааста. Бу дьоро тэрээһиҥҥэ үөрэх туйгуннара, бастыҥ общественниктар, сыл уһулуччулаах спортсменнара чиэстэннилэр.


Бу үтүө үгэс сылын ахсын ыытыллар. Барыта холбоон улуус үрдүнэн 3747 үөрэнээччилээх 27 оскуолаттан бастыҥтан бастыннар ааттанар, чиэстэнэр үөрүүлээх харыйаларын тула 400-чэкэ үөрэнээччи муһунна. Харыйа уотун тула оонньууну-көрү көҕүлүттэн туттулар.

Хадаар орто оскуолатын үөрэнээччилэрэ илиҥҥи омуктар үҥкүүлэригэр олоҕурбут, бэрт интэриэһинэй инсценировканы оонньоон көрдөрдүлэр. Оҕону барытын хабан, артыыстааһын маастарыстыбатыгар толору уһуйан туруоруллубут нүөмэр дохсун ытыс тыаһынан биһирэннэ.

Улуус баһылыга А.Т. Ноговицын бары мустубут үөрэх, спорт бастыҥнарын эҕэрдэлээн туран, сыл бастыҥнарыгар анал номинациялары туттартаата. Ааспыт сыл улууска Музей сылынан биллэриллэн үгүс үлэ-хамнас ыытыллыбыта. Манна учууталлар, үөрэнээччилэр бэйэлэрин кылааттарын киллэрэн сүҥкэн өйөбүлү оҥорбуттара. «Быйыл биллэриллибит История сылыгар эмиэ биир киһи курдук ылсан үлэлиирбитигэр ыҥырабын», — диэтэ баһылык.