Олунньу 3 күнүгэр, эбиэт саҕана, Орто Халыма куоракка Навроцкай аатынан уулусса 8 “а” нүөмэрдээх дьиэтигэр кырыыһа самнан түспүтэ. Ити быйыл олус халыҥ хаар түспүтүттэн буолла. Хамыыһыйа тута тэриллэн, анал аакта толоруллубута уонна өрөмүөҥҥэ туһааннаах смета оҥоһулларыгар улуустааҕы архитектура уонна капитальнай тутуу управлениетыгар бэриллибитэ.
Бу — учууталлар уопсайдара. Манна 7 хоско 20 киһи, ол иһигэр 8 оҕо олорор. Дьиэлэр сылаастар. Ол эрээри, олохтоохтору маннык түгэҥҥэ ким эппиэттээҕий диэн өрөмүөн боппуруоһа долгутар.
Дьиэ оскуола балансатыгар турар буолан, өрөмүөҥҥэ тэрилтэ эппиэттээх. Ол эрээри, бу курдук буолуо диэн ким даҕаны эрдэттэн өтө көрбөтөҕө. Онон маннык түгэннэр тахсалларыгар диэн анаан үп ууруллубатаҕа. Күүтүллүбэтэх өттүттэн соһуччу тахсыбыт быһылааны туоратарга сибилигин соҕотох оскуола уйунар кыаҕа суох. Онон улуустан, куорат дьаһалтатыттан бииргэ үлэлэһии эрэйиллэр.
Соһуччу түбэлтэ хаһан баҕарар күүппэккэ сырыттахха буолар. Онон мантан саас ханнык баҕарар дьиэҕэ бу курдук түбэлтэ тахсыан сөп. Итинниккэ эрдэттэн бэлэмнээх буоларбыт ирдэнэр. Куорат дьаһалтатын баһылыгын эбээһинэһин толорооччу И.П.Моттуев быһаарбытынан, дьиэ муниципальнай бас билиигэ суох буоллаҕына, хаһаайыттар эппиэтинэстэригэр турар. Ол эбэтэр элбэх кыбартыыралаах уопсай дьиэҕэ олорооччулар бэйэлэрэ көрө-истэ сылдьыахтаахтар диэн хоруй бэрилиннэ.
Онтон өрөбүл күн аны өссө биир уопсайга, Степанов-Ламутскай аатынан 12 нүөмэрдээх дьиэҕэ (ааспыт өттүгэр ырыынак), кырыыһата самнан түстэ. Бу дьиэ куорат дьаһалтатын бас билиитигэр турар буолан, өрөмүөнү дьаһалта бэйэтэ ыытыаҕа.